ގދ. ތިނަދޫއަށް ސިޓީއެއްގެ ދަރަޖަ ދިނުން ބާތިލްކުރުމަށް ހައި ކޯޓަށް މައްސަލަ ހުށަހެޅި، އެންވަޔަރަމެންޓް މިނިސްޓްރީގެ ނައިބު ވަޒީރު މުޙައްމަދު ރާޣިބު އެ މަގާމުން ވަކިކުރައްވައިފިއެވެ.

އޭނާ އެ މަގާމުން ރައީސް ޑރ. މުޙައްމަދު މުޢިއްޒު ވަކިކުރެއްވިކަން އިއުލާންކުރެއްވީ ސަރުކާރުގެ ތަރުޖަމާނު ހީނާ ވަލީދު މިއަދު "އެކްސް"ގައި ކުރެއްވި ޕޯސްޓެއްގައެވެ. އެގޮތުން އެ ޕޯސްޓުގައި ހީނާ ވިދާޅުވި ގޮތުގައި، ރާޣިބު އެ މަގާމުން ވަކިކުރެއްވީ ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެންނެވެ.

އެގޮތުން މީގެ ކުރިން ވެސް ދައުލަތުގެ ނައިބު ވަޒީރެއްގެ ގޮތުގައި ހުންނަވައިގެން ދައުލަތާ ދެކޮޅަށް ވަކާލާތުކުރަން ރާޢިބް ވަޑައިގެންނެވުމުން، އެކަން އެގޮތަށް ނުކުރެވޭނެ ކަމުގައި ހައި ކޯޓުން އަމުރުކޮށްފައިވެއެވެ. އެގޮތުން މި މަހު ކުރީކޮޅު ހައި ކޯޓުން ނެރުނު އަމުރުގައި ބުނީ، ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކު ހަމަޖައްސަވާ ސިޔާސީ މަގާމެއްގައި ހުންނަވައިގެން، ދައުލަތާ ދެކޮޅަށް ވަކާލާތު ނުކުރެވޭނެ ކަމަށެވެ.

އެހެން ނަމަވެސް، ނައިބު ވަޒީރުގެ މަގާމުގައި ހުންނަވައިގެން ތިނަދޫއަށް ސިޓީއެއްގެ ދަރަޖަ ދިނުން ބާތިލްކުރުމަށް އެދި ހައި ކޯޓަށް ރާޣިބް މައްސަލަ ހުށަހެޅުއްވީ މިއަދުގެ ވަގުތެއްގައެވެ. އެގޮތުން އެ މައްސަލަ އޭނާ ހުށަހެޅުއްވީ، ތިނަދޫ އަށް ސިޓީގެ ދަރަޖަ ދިން އިރު، އެ ރަށުގައި ސިޓީއަކަށްވުމުގު ޝަރުތުތަކުގެ ތެރޭގައި ހިމެނޭ އެއް ޝަރުތުކަމުގައިވާ 10،000 މީހުންގެ އާބާދީ ހަމަނުވާ ކަމުގައި ވިދާޅުވަމުންނެވެ.

ރާޣިބް އެ މައްސަލަ ހުށަހެޅުއްވި ނަމަވެސް، އަދި އެ މައްސަލަ ހައި ކޯޓުން ބަލައިގަތްކަމެއް ސާފުވެފައެއް ނުވެއެވެ.