ރާއްޖެއަށް އަންނަ ބޮޑެތި އިންވެސްޓްމަންޓްތަކާ ގުޅޭގޮތުން ދޮގު ވާހަކަ ފަތުރައި، އިންވެސްޓަރުން ފައްސާލުމަށް ކުރެވޭ މަސައްކަތްތަކުގެ ސަބަބުން އެ ފަރާތްތަކުގެ ޤައުމާމެދު އޮތް އިޚްލާސްތެރި ނިޔަތާމެދު ސުވާލު އުފެދޭ ކަމަށް ފަންނާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ވަޒީރު ހީނާ ވަލީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ރާއްޖެއަށް އަންނަ ބޮޑެތި އިންވެސްޓްމަންޓްތަކާ ބެހޭގޮތުން ދޮގު ވާހަކަ ފަތުރައި ސަރުކާރާ ދޭތެރޭ ފިތުނަ އުފައްދާ، އިންވެސްޓަރުންގެ ހިތުގައި ލަކުނު ޖައްސާ ލައްޖެއްސުމުގެ ނަތީޖާ މީގެ ކުރިންވެސް މި ޤައުމުން ފެނިގެން ގޮސްފައިވާ ކަމަށެވެ. އަދި އެކަން އެންމެ ރަނގަޅަށް ތަޖުރިބާ ކުރެވުނު "ފާފު އަތޮޅުގެ" މަޝްރޫޢުން ފިލާވަޅު ލިބިގަންނަން ޖެހޭ ކަމަށްވެސް އެކަމަނާ ފާހަގަކުރެއްވިއެވެ.

Ad by Hajj Corporation

އީގަލްސް ހިލްސްއިން ރަސްމާލޭގައި ކުރާ އިންވެސްޓްމަންޓަށް އަލިއަޅުއްވާލައްވަމުން ހީނާ ވިދާޅުވީ، އެ އިންވެސްޓްމަންޓުން ދައުލަތަށް ލިބޭނެ ކަމަށް ބެލެވޭ އާމްދަނީއަކީ ރާއްޖޭގެ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީން މިހާރު ލިބޭ އާމްދަނީއަށްވުރެ ބޮޑު އާމްދަނީއެއް ކަމަށެވެ. އަދި މިހާރު ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން ޑޮލަރު ކަމަށްވެސް އެކަމަނާ ހާމަކުރެއްވިއެވެ.

ހީނާ ވަލީދު އިތުރަށް ގޮވާލެއްވީ، "ތާއަބަދު ނަފްރަތާ ހަސަދަވެރިކަމުގެ އަނދިރި ކަމުގެ ތެރޭގައި ނުތިބެ، ވެރިކަމުގެ ދަހިވެތިކަން އެއްފަރާތްކޮށް ޤައުމީ ވިސްނުމުގައި ކަންކަމާމެދު ވިސްނާކަށް ނުވޭތޯ؟" ސުވާލު އުފައްދަވަމުންނެވެ.