މާލެ އަތޮޅު ހުރާ ކައުންސިލުގެ ތިންވަނަ މަދަހަ މުބާރާތުގެ ފަޙުރުވެރި އެއްވަނަ ދެވަނަ ތިންވަނަ، ޒޯނު ދެއެއްގެ ތިން ބައިވެރިން ހޯދައިފިއެވެ.

މުޅި މުބާރާތުން ފަޙުރުވެރި އެއްވަނައަށް ގޮސްފައިވަނީ ޒޯން 2 ގެ ފާޠިމަތު ނަޠާޝާއެވެ. ނަތާޝާ ވަނީ މުޅި މުބާރާތުން އެއްވަނަ ހޯދާ "ދަ ޓްރެވެލަރސް ޙައްޖު އެންޑް ޢުމްރާ" ގެ ޢުމްރާ ދަތުރުގެ އިތުރުން ފައިސާގެ އިނާމާއި ޓްރޮފީ ޙާޞިލްކޮށްފައެވެ.

Ad by Hajj Corporation

މުޅި މުބާރާތުން ފަޙުރުވެރި ދެ ވަނަ އަށް ހޮވިފައިވަނީ ޒޯން ދެއެއްގެ ތުޙުފާ އިބްރާހީމްއެވެ. ތުޙުފާވަނީ ފައިސާގެ އިނާމުގެ އިތުރުން ޓްރޮފީ ޙާޞިލްކޮށްފައެވެ. އަދި މުޅި މުބާރާތުން ފަޙުރުވެރި ތިން ވަނަ އަށް ހޮވިފައިވަނީ ޒޯން ދެއެއްގެ ޢާއިޝަތު ޖަޒްލާ ވާފިރުއެވެ. ޖަޒްލާއަށްވެސް ފައިސާގެ އިނާމުގެ އިތުރުން ޓްރޮފީ ލިބިފައިވެއެވެ.

މި އިނާމުތަށް މި ތިން ބައިވެރިންނާ ހަވާލުކޮށްދެއްވީ ޖަލުސާގެ ޝަރަފުވެރި މެހެމާނު ކުރީގެ މަޝްޙޫރު ލަވަ ކިޔުންތެރިއާ ޢުމަރު ޒާހިރެވެ.

މި މުބާރާތަކީ ރަށުގެ 3 ޒޯންގެ މެދުގައި ކުރިއަށްދިޔަ މުބާރާތެކެވެ. މުބާރާތުގައި ބައިވެރިން ވާދަކޮށްފައިވަނީ އިންޑިވިޖުއަލް އަދި ގްރޫޕްތަކުގެ މެދުގައެވެ.

މި މުބާރާތުގެ ނަތީގާ ފާޅުކުރި ޖަލްސާގައި މާލެ އަތޮޅު ކައުންސިލްގެ ނައިބު ރައީސް އަދި ހުރާ ކައުންސިލް ރައީސް އީސާ އަޙުމަދު ވިދާޅުވީ، މިމުބާރާތަކީ ހުރާގައި އެކުވެރިކަން ޢާލާ ކުރުމާއި ޒޯންތަކުގެ މެދުގައި ވާދަވެރިކަން އިތުރުކުރުމުގެ މަޤްޞަދުގައި 2023ވަނަ އަހަރުން ފެށިގެން ބާއްވަމުން އަންނަ މުބާރާތެއް ކަމަށެވެ. އަދި މިއީ މިފަދަ ތިންވަނަ މުބާރާތްކަންވެސް ފާހަގަކުރެއްވިއެވެ.

މި މުބާރާތް ކުރިއަށް ގެންގޮސްފައިވަނީ ހުރާ ކައުންސިލާ ކ.ހުރާ ބެލިސިމޯ ސްޕޯޓްސް އާއި ގުޅިގެންނެވެ.

މި މުބާރާތުގައި ގްރޫޕް މަދަޙަ ކިޔުމުން 1 ވަނަ ހޯދީ ޒޯން 3ން ބައިވެރިވި އަބަދީ ނިޝާން ގްރޫޕެވެ. 2 ވަނަ ހޯދީ ޒޯން 3ން ބައިވެރިވި ވުޞޫލް އަލްނަބަވީ ގްރޫޕެވެ. އަދި 3 ވަނަ ހޯދީ ޒޯން 2 ން ބައިވެރި ޒިކުރު ގްރޫޕުންނެވެ.

ރަށުގެ 3 ޒޯންގެ މެދުގައި ކުރިއަށްގެންދިޔަ މި މުބާރާތް އިންސާފުކޮށްދެއްވީ ރާއްޖޭގެ މަޝްހޫރު ލަވަކިޔުންތެރިން ކަމުގައިވާ ރާފިޔަތު ރަމީޒާ އަދި އިބްރާޙިމް އާމިރުއެވެ. ކައުންސިލުން ފާހަގަކުރި ގޮތުގައި މިއީ ކައުންސިލް މިދައުރަށް އިންތިޚާބުވެ ބަޖެޓް ހަމައަކަށް އެޅުމުން ބޭއްވި މުބާރާތެއްކަމުން މިމުބާރާތުގެ ނަޠީޖާ ވަރަށް ރަނގަޅުކަމަށެވެ. މިހާތަނަށް ތިން މުބާރާތެއް ބާއްވާފައިވާއިރު އެއް އަހަރުން އަނެއް އަހަރަށް ކުރިއެރުންތައް ލިބެމުން އަންނަކަން ކައުންސިލުން ފާހަގަކުރެއްވިއެވެ.

ރަށުގެ ތިން ޒޯންގެ މެދުގައި ކުރިއަށް ދިޔަ މި މުބާރާތުގައި އިންޑިވިޖުއަލްކޮށް 55 ބައިވެރިން ވަނީ ބައިވެރިފައެވެ. އަދި ގްރޫޕްގެ ގޮތުގައި 15 ގްރޫޕް ބައިވެރިވެފައިވެއެވެ.

މި މުބާރާތުގެ ސްޕޮންސަރއަކީ "ދަ ޓްރެވެލަރސް ޙައްޖު އެންޑް ޢުމްރާ" ގްރޫޕެވެ. އަދި މިއީ މިފަހުން ހުރާގައި ހިންގި ޤުރުޢާން މުބާރާތްވެސް ސްޕޮންސަރކުރި ފަރާތްވެސް މެއެވެ.

މިއީ ރަށުގެ ރައްޔިތުންގެ ފަރާތުން ވަރަށް ބޮޑު ތަރުޚީބެއް ލިބޭ މުބާރާތެކެވެ. މި މުބާރާތަށް ލިބުނު ތަރުޚީބަށް ބަލައި ދެން ކުރިއަށް ހުރި މުބާރާތްތައް މިއަށްވުރެއްް ފުރިހަމައަށް އަދި މިއަށްވުރެ ކުލަގަދަކޮށް ބޭއްވުމަށް މަސައްކަތްކުރައްވާނެކަމަށްވެސް ކައުންސިލްގެ ރައީސް އީސާ އަޙުމަދު ވިދާޅުވިއެވެ.