ފެނަކަ ކޯޕަރޭޝަނުގެ މަސައްކަތްތައް ހަލުވިކޮށް، ފަސޭހަ ކުރުމަށްޓަކައި އެ ކޯޕަރޭޝަން އިން ޒަމާނީ އައު އެޗް އާރު ސޮފްޓްވެއާއެއް އެކުލަވާލައިފިއެވެ.

ފެނަކައިން މިއަދު ބޭއްވި ޚާއްސަ ޙަފުލާއެއްގައި "ވަށާރު" ސޮފްޓްވެއާ އިފްތިތާޙްކޮށްދެއްވީ އެ ކުންފުނީގެ މެނޭޖިން ޑިރެކްޓަރު މުއާޒް މުހައްމަދު ރަޝީދުއެވެ. މި ހަފްލާގައި ވަނީ ފެނަކައިން މިހާރު ތައާރަފް ކުރި ސްމާޓް އެޕްލިކޭޝަންތަކައި ޑިިޖިޓަލައިޒޭޝަންގެ މަޢުލޫމާތު އާއްމުކޮށްފައެވެ.

ފެނަކައިން މިއަދު އިފްތިތާހް ކުރި ޑިޖިޓަލް މަގުޗާޓުގެ ފައިދާތަކަށް އަލި އަޅުވާލަމުން އެކުންފުނީގެ އެމްޑީ މުއާޒް ވިދާޅުވީ ފެނަކައިގެ ހުރިހާ ޙިދުމަތްތަކެއް އަމާޒުވަނީ ރައްޔިތުންނަށް ކަމަށް ވުމުން އެކުންފުނިން ކުރާ މަސައްކަތްތަކުގެ މައުލޫމާތު ރައްޔިތުންނަށް އެންމެ ފުރިހަމައަށް އެނގެންޖެހޭ ކަމަށެވެ. މުއާޒް ވިދާޅުވީ މިސަރުކާރުން ފެނަކައާއި ހަވާލުވި ފަހުން ސަތޭކައަށް ވުރެ ގިނަ ރަށްތަކަށް ދަތުރުކޮށްފައިވާ ކަމަށާއި މި ދަތުރުތަކުން ފާހަގަވި މައިގަނޑު އެއް ކަމަކީ ފެނަކައިގެ ހެޑް އޮފިހާއި ކުންފުނިން ޙިދުމަތްދޭ ރަށްތަކާއި ދެމެދު އޮންނަ ގުޅުން ގުޅުން ކެނޑިފައިވާކަމެވެ.

މުއާޒް ވިދާޅުވީ ގޮތްނިންމުމާއި އިދާރީ ކަން ކަން އަދި ކުންފުނި ހިންގުމުގައި ނިޔާ ކަނޑައަޅަން ޖެހެނީ މާލޭގައި ހުންނަ ހެޑް އޮފީހުން ކަމުގައި ވީ ނަމަވެސް، އެކުންފުނީގެ ގިނަ ޙިދުމަތްތައް ދޭ ގިނަ ތަންތަން ގާއިމްކޮށްފައި ހުންނަނީ އަތޮޅު ތެރޭގައިކަމަށެވެ. އެހެން ކަމުން މިއަދު މިގާއިމް ކުރެވުނު ޑިޖިޓަލް މަގު ޗާޓަކީ ޙިދުމަތްތަށް ފަސޭހަކަމާއި އެކު ރައްޔިތުންނަށް ފޯރުކޮށް ދިނުމަށް ވަރަށް މުހިއްމު އަސާސެއްކަމަށް މުއާޒް ވިދާޅުވިއެވެ..

މުއާޒް ވިދާޅުވީ ފެނަކައިގައި 8200 މުވައްޒަފުން ތިބޭ ކަމަށާއި އެ މުވައްޒަފުންނަށް މުސާރަ ދިނުމުގައި ވެސް އަމަލުކުރަނީ އެކްސެލް ޝީޓެއްގައި އަތުން ލިޔެގެން ކަމަށެވެ.އަދި ޗުއްޓީ އަކަށް އެދެން ވެސް ޖެހެނީ ބޮޑު ފޯމެއް ފުރަން ކަމަށާއި އަދި އެއީ ޒަމާނީ މިންގަނޑަކުން ބަލާއިރު އެއްވެސް ކުންފުންޏެއްގައި މިހާރު އަމަލުކުރާ ގޮތެއް ނޫންކަމަށެވެ. ވޭތުވެ ދިޔަ ދުވަސްތަކުގައި މުވައްޒަފުންނަށް މިކަންކަން ހުރީ ވަރަށް ދަތިކޮށް ކަމަށް ފާހަގަ ކުރައްވަމުން މުއާޒް ވިދާޅުވީ އެކުންފުނީގެ ބޭނުމަކަށްވީ ހިއުމަން ރިސޯސް ސޮފްޓުވެއާ އެއް ބޭނުންކޮށްގެން މިފަދަ ކަންކަން ފަސޭހަ ކުރުން ކަމަށެވެ.

ފެނަކައިން މިއަދު އިފްތިތާޙްކުރި ސޮފްޓްވެއާގެ ސަބަބުން ކަރުދާސް ބޭނުންކުރާ މިންވަރު މަދުވެ މައުލޫމާތު ރައްކާކޮށް ފޯރުކޮށްދިނުމަށް ބޮޑެތި ފަސޭހަތަކެއްވާނެ އެކުންފުނިންވަނީ ބުނެފައެވެ. އަދި ވަކި ވަކި ތަންތަނުން ފޮނުވާ ލިޔުންތައް އެއްތަންކޮށް، ރައްކާތެރިކުރުމުގައި ހުރި ގޮންޖެހުން ތަކާއި ދަތިތައް ހައްލުވެ، މެއިލްތަކާއި ތަކުރާރުކޮށް އެއް ކަމެއްގައި ކުރަންޖެހޭ ފޯނު ކޯލުތައް މަދުވާނެ ކަމަށް ވެސް އެ ކުންފުނިން ބުންޏެވެ.

މިބަދަލުތަކާއި އެކު ކަސްޓަަމަރުންނަށް ޙިދުމަތްދޭން ކުރަންޖެހޭ އިދާރީ މަސައްކަތްތަކަށް ވަރަށް ބޮޑު ލުޔެއް އަންނާނެކަމަށާއި 150 އަށް ވުރެ ގިނަ ރަށަށް އެއްފަހަރާ ޙިދުމަތް ފޯރުކޮށްދޭ އިރު މެނުއަލް ސިސްޓަމެއް އޮތުމަކީ ވަރަށް ވެސް ބޮޑު ގޮންޖެހުމެއް ކަމަށް ފެނަކައިން ވަނީ ބުނެފައެވެ. އެ ކުންފުނިން ބުނި ގޮތުގައި، މިއަދު އެކުންފުނިން އިފްތިތާހުކުރި ޑިޖިޓަލް މަގު ޗާޓުގައި ހިމެނޭ ހުރިހާ މަސައްކަތެއް ކޮށްފައިވަނީ ރާއްޖޭގެ ޑެވެލޮޕަރުންނެވެ.