މިހާރު ރާއްޖެއަށް ޒިޔާރަތް ކުރަމުންގެންދާ ލިވަރޕޫލްގެ އިސް އޮފިޝަލުންނާއި ކުޅިވަރާއި ހަށިހެޔޮކަމާބެހޭ ވަޒީރު އަބްދުﷲ ރާފިއު ބައްދަލުކުރައްވައިފިއެވެ. މިބައްދަލުވުމުގައި ރާއްޖޭގައި ލިވަޕޫލް ފުޓްބޯޅަ އެކަޑަމީއެއް ގާއިމުކުރުމާއި ގުޅޭގޮތުން މަޝްވަރާތަކެއް ކުރިއަށް ގެންގޮސްފިއެވެ. މީގެ އިތުރުން ރާއްޖޭގެ ކޫލިވަރު ކުރިއެރުވުމާއި ގުޅޭގޮތުންވެސް މިބައްދަލުވުމުގައި މަޝްވަރާކުރެވިފައިވެއެވެ.

ލިވަޕޫލް އެފްސީގެ ޕާޓްނަޝިޕްސް ޑެލިވަރީގެ ނައިބު ރައީސް ޑޭވިޑް ޕޯލް އާއި އެލްއެފްސީ އެކްސް ވިޒިޓް މޯލްޑިވްސް ޕާޓްނަޝިޕްގެ ގްލޯބަލް ޕާޓްނަޝިޕް ސޭލްސްގެ ޑިރެކްޓަރު އެލެކްސް ފްރޭސަރ ހިމެނޭ ވަފުދެއް މިވަގުތު ދަނީ ރާއްޖޭގައި ދަތުރުފުޅެއް ކުރައްވަމުންނެވެ. މި ދަތުރުފުޅުގައި އެމްއެމްޕީއާރްސީގެ އިސްވެރިންނާއެކު ވެސް ބައްދަލުވުންތަކެއް ބާއްވާފައިވެއެވެ.

Ad by Hajj Corporation

ފާއިތުވި މާޗު 13 ވަނަ ދުވަހު ވަނީ ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ދިވެހިރާއްޖެ ހަމަޖައްސާފައެވެ. މި އެއްބަސްވުމަކީ ތިން އަހަރާއި ހަ މަސް ދުވަހުގެ މުއްދަތަށް ކުރިއަށްދާނެ އެއްބަސްވުމެކެވެ. އަދި މި ކެމްޕޭން ރަސްމީކޮށް އިފްތިތާހު ކޮށްދެއްވީ 3 އޭޕްރީލްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ލިވަޕޫލުގެ އެންފީލްޑް ސްޓޭޑިއަމަށް ކުރެއްވި ޒިޔާރަތެއްގައެވެ.

އެމްއެމްޕީއާރްސީން މަޢުލޫމާތު ދެއްވާފައިވާ ގޮތުގައި ލިވަޕޫލާއެކު ވެފައިވާ އެއްބަސްވުމުގެ ދަށުން ގިނަ ހަރަކާތްތަކެއް ހިންގުމަށް ވަނީ ރޭވިފައެވެ. އެގޮތުން އަންނަ މަހު ލިވަޕޫލުގެ ކުޅުންތެރިން ހިމެނޭ ކޮންޓެންޓް ބޭނުންކޮށްގެން ބައިނަލްއަގްވާމީ ކެމްޕޭނެއް ފެށުމަށް ވަނީ ނިންމާފައެވެ.

މި އެއްބަސްވުމުގެ ދަށުން ރާއްޖޭގެ އެތުލީޓުންނަށް ލިވަޕޫލް އެފްސީގެ ކޯޗުންގެ އިރުޝާދާއެކު ތަމްރީނު ފުރުސަތުތައް ހޯދުމާއި، ރާއްޖެއާއި އިނގިރޭސިވިލާތުގައި އެތުލީޓުން ތަމްރީނުކުރުމުގެ ފުރުސަތުތައް ފަހިވެގެންދާނެކަމަށް ވަނީ ފާހަގަކުރެވިފައެވެ. އެމްއެމްޕީއާރްސީން ބުނެފައިވަނީ ލިވަޕޫލްގެ ސީނިއާ މެނޭޖްމެންޓްގެ މި ޒިޔާރަތަކީ ގުޅުންތައް ބަދަހިކުރުމަށާއި ދެފަރާތުން ގުޅިގެން އެއްބާރުލުންދެވޭނެ ފުރުސަތުތައް ހޯދުމަށް އެޅޭ މުހިންމު ފިޔަވަޅެއް ކަމަށެވެ.