ޑިޕާރޓްމެންޓް އޮފް ޖުވެނައިލް ޖަސްޓިސްއާއި، ނޭޝަނަލް ޑްރަގް އެޖެންސީއާއި ދެމެދު ފަހުމުނާމާއެއްގައި ސޮއިކޮށްފިއެވެ.

މި ފަހުމުނާމާގައި ޑީޖޭޖޭގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް އަލްއުސްތާޛް އަޙްމަދު ޞިއްދީޤެވެ. އަދި ނޭޝަނަލް ޑްރަގް އެޖެންސީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް އަދި ނޭޝަނަލް ޑްރަގް އެޖެންސީގެ ބޯޑުގެ ޗެއަރޕާރސަން އަލްއުސްތާޛާ ލުބްނާ މުޙައްމަދު ޒާހިރު ޙުސައިނެވެ. މި ރަސްމިއްޔާތުގައި ޑިޖޭޖޭއާއި، ނޭޝަނަލް ޑްރަގް އެޖެންސީގެ އިސް ވެރިން ބައިވެރިވެވަޑައިގެންނެވިއެވެ.

މި އެމްއޯޔޫގެ މަޤްޞަދަކީކުޑަކުދިންގެ ޢަދުލުގެ ޤާނޫނުގެ ދަށުން ޑިޕާރޓްމެންޓް އޮފް ޖުވެނައިލް ޖަސްޓިސްއަށް ހުށަހެޅޭ ކުޑަކުދިންނާއި ގުޅޭ މައްސަލަތަކުގެ ތެރެއިން މަސްތުވާތަކެތީގެ މައްސަލަތަކުގައި ޝާމިލްވާ ކުދިންނާއި، ނަފްސާނީ އެހީތެރިކަން ބޭނުންވާ ކުދިންނަށް ބޭނުންވާ ޚާއްޞަ ފަންނީ އެހީތެރިކަން އަވަސް ފުރުޞަތެއްގައި ފޯރުކޮށްދިނުމާއި، ޑިޕާރޓްމެންޓް އޮފް ޖުވެނައިލް ޖަސްޓިސްގެ ފަރާތުން ކުޑަކުދިން މަސްތުވާތަކެތިން ރައްކާތެރިކުރުމަށް ހިންގާ ހޭލުންތެރިކުރުމުގެ ޕްރޮގްރާމްތަކާއި އެފަދަ ޙަރަކާތްތަކުގައި ދެ އިދާރާ ގުޅިގެން މަސައްކަތްކުރުމެވެ.

މި ރަސްމިއްޔާތުގައި އެންޑީއޭގެ ބޯޑުގެ ޗެއަރޕާރސަން އަލްއުސްތާޛާ ލުބްނާ މުޙައްމަދު ހާޒިރު ޙުސައިން ވިދާޅުވީ ޑީޖޭޖޭއާއި އެންޑީއޭއާއި ދެމެދުގައި މިއަދު ސޮއިކުރެވުނު ފަހުމުނާމާގެ އެހީގައި ދެ އިދާރާގައި ހުރި ޓެކްނިކަލް އެކްސްޕަޓީޒް ނުވަތަ ފަންނީ ހުނަރާއި ގާބިލްކަން އެއްކޮށްލައިގެން މަސައްކަތްކުރެވޭނެގޮތް ފަހިވެގެންދާނެކަމަށާއި، އެކަމުގެ ސަބަބުން ނަތީޖާ ނެރެވޭ މިންވަރު އަވަސްވެފައި ދެފަރާތަށްވެސް އެކަމުގެ މަންފާކުރާނެކަން އެކަމަނާ ފާހަގަކުރައްވާފައިވެއެވެ.