ދިވެހި ފުލުހުންގެ މައި މަރުކަޒާއި ޑާޓާ ސެންޓަރު ހުޅުމާލޭގައި އެޅުމަށް އެއްބަސްވުމުގައި، ހައުސިން ޑިވެލޮޕްމަންޓް ކޯޕަރޭޝަނާއެކު އެއްބަސްވުމުގައި ސޮއިކޮށްފިއެވެ.ފުލުހުންގެ ފަރާތުން އެއެއްބަސްވުމުގައި ސޮއިކުރެއްވީ ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީންއެވެ. އެޗްޑީސީގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރ މައުރޫފް ޖަމީލެވެ. މިމަޝްރޫޢާ ގުޅޭ އިތުރު މަޢުލޫމާތެއް ފުލުހުން ހާމަކޮށްފައެއްނުވެއެވެ.

ދިވެހި ފުލުހުންގެ ޚިދުމަތް ފުޅާކުރުމަށް ދަނީ މަސައްކަތް ކުރަމުންދާކަމަށް ފުހުލުން ބުނެފައިވެއެވެ. ހުޅުމާލެއަށް ފުލުހުންގެ މައި އިދާރާ ބަދަލުކުރުމަށް ނިންމާފައިވާއިރު ހުޅުމާލެ ފުރަތަމަ ފިޔަވަހީގައިވެސް ޕޮލިސް ސްޓޭޝަނެއްވަނީ ޤާއިމްކޮށްފައެވެ.ފުލުހުންގެ މައި މަރުކަޒުގެ ގޮތުގައި މިހާރު ބޭނުންކުރަމުން ދަނީ ޝަހީދު ހުސައިން އާދަމް ބިލްޑިންއެވެ. މިއީ 1999 ވަނަ އަހަރު ހުޅުވި އިމާރާތެކެވެ.