އިސްރާއީލުން ހިފާފައިވާ ހުޅަނގު އައްސޭރީގެ ޖެނިންގައި ޑިޕްލޮމެޓިކް ވަފުދަކަށް ބަޑިޖަހައި އިސްރާއީލުގެ އިސްތިއުމާރީ ބާރުތަކުން ދިން ހަމަލާ ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފިއެވެ.

ކެނެޑާ، އިޓަލީ، ބެލްޖިއަމް، އިނގިރޭސިވިލާތް އަދި އެހެނިހެން ގައުމުތަކުގެ ޑިޕްލޮމެޓުންގެ ވަފުދަށް އިސްރާއީލުން ހަމަލާދީފައިވަނީ ޖެނިން ރެފިއުޖީ ކޭމްޕުގެ ހާލަތު ބެލުމަށް ފަލަސްތީނުން ދިން ދައުވަތަކަށް އެސަރަހައްދަށް ދަތުރުކުރަމުން ދަނިކޮށެވެ.

Ad by Hajj Corporation

މިކަމާ ގުޅިގެން ނެރުނު ބަޔާނެއްގައި ދިވެހި ހާރިޖިއްޔާއިން ބުނީ އިސްރާއީލުގެ އިސްތިއުމާރީ ބާރުތަކުން ބައިނަލްއަޤްވާމީ ޤާނޫނާއި ޑިޕްލޮމެޓިކް އުޞޫލުތަކާއި ހިލާފަށް ހިންގި މި އަމަލަކީ ނުހަނު ކަންބޮޑުވާކަމެއް ކަމަށާއި، މިއީ ބައިނަލްއަޤްވާމީ މުޖުތަމައުން ހަރުކަށި އިބާރާތުން ކުށްވެރިކުރެވެންޖެހޭ ކަމެއްކަމަށެވެ.

އަދި އިސްރާއީލުގެ މި އަމަލުތަކަކީ ބައިނަލްއަޤްވާމީ ޤާނޫނުތަކުގެ ދަށުން އިސްރާއީލަށް މަތިކޮށްފައިވާ ވާޖިބުތަކާއި ޒިންމާތަކާއި މުޅިން ހިލާފުކަމެއްކަމަށާއި، ޑިޕްލޮމެޓިކް މިޝަންސްތަކާއި، ޑިޕްލޮމެޓިކް މުވައްޒަފުންނަކީ ވިއެނާ ކޮންވެންޝަންގެ ދަށުންވެސް އިމްތިޔާޒުތަކާއި ރައްކާތެރިކަން ލިބިފައިވާ ތަންތަނާއި ފަރާތްތަކެއްކަން ސަރުކާރުން ވަނި ފާހަގަކޮށްފައެވެ.

އަދި އިސްރާއީލްގެ މި އަމަލުތައް، ކުށްވެރިކޮށް، ބައިނަލްއަޤްވާމީ މުޖުތަމައުން، އިސްރާއީލުން ބައިނަލްއަޤްވާމީ ޤާނޫނުތައް މުގުރާލައި ދެމުންދާ ހަމަލާތަކަށް ޖަވާބުދާރީކުރުވައި، ބައިނަލްއަޤްވާމީ ޤާނޫނުތަކާއި މުޢާހަދާތަކާއި ޑިޕްލޮމެޓިކް އުޞޫލުތަކާ އެއްގޮތަށް ޑިޕްލޮމެޓިކް މިޝަންތައް ހިމާޔަތްކުރުމަށް ވަރުގަދަ ފިޔަވަޅުތަކެއް އެޅުމަށްވެސް ސަރުކާރުންވަނީ ގޮވާލާފައެވެ.

މި ހާދިސާއާ ގުޅިގެން އިޓަލީ، ސްޕެއިން އަދި ފްރާންސްއިން ވަނީ އިސްރާއީލުގެ ސަފީރުން ހާޒިރުކޮށް މައްސަލަ ސާފުކުރުމަށް އެދިފައެވެ. އަދި ޔޫރަޕިއަން ޔޫނިއަންގެ ފޮރިން ޕޮލިސީ ޗީފް ވަނީ މި ހާދިސާ ތަހުގީގު ކުރުމަށް ގޮވާލާފައެވެ.