އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.) އިން ތުރުކިޔޭގެ އިސްތަންބުލްގައި ބޭއްވުމަށް ހަމަޖެހިފައިވާ އެޖަމުޢިއްޔާގެ ޚާރިޖީ ވަޒީރުންގެ ކައުންސިލްގެ 51 ވަނަ ބައްދަލުވުމުގައި ދިވެހިރާއްޖޭގެ ޚާރިޖީ ވަޒީރު، ޑޮކްޓަރ ޢަބްދުﷲ ޚަލީލް ބައިވެރިވެވަޑައިގެންފިއެވެ.

އިސްލާމީ އުއްމަތަށް ދިމާވެފައިވާ މުހިންމު މައްސަލަތަކަށް ހައްލު ހޯދުމާ ގުޅޭގޮތުން މަޝްވަރާކުރުމަށް ކޮންމެ އަހަރަކު ބާއްވާ މި ބައްދަލުވުމުގައި، އޯ.އައި.ސީ.ގެ ގިނަ މެމްބަރު ޤައުމުތަކުގެ ޚާރިޖީ ވަޒީރުން ބައިވެރިވެވަޑައިގަންނަވައެވެ. މިއަހަރުގެ ސެޝަންގެ ޗެއަރގެ މަގާމާ ތުރުކިޔޭގެ ފޮރިން މިނިސްޓަރ، ހަކަން ފިދާން ހަވާލުވެވަޑައިގަންނަވާނެއެވެ.

މި ބައްދަލުވުމުގައި ޑރ. ޚަލީލް ދެއްވާ ތަޤްރީރުގައި، އިސްރާއީލުން ޣައްޒާ އަދި ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރި ޢަމަލުތައް ކުށްވެރިކުރައްވައި، އިސްރާއީލުން އީރާނަށް ދެމުންގެންދާ ހަމަލާތައް ހުއްޓުވުމަށާއި، އިސްރާއީލުގެ މައްޗަށް ބައިނަލްއަޤްވާމީ ޤާނޫނު ތަންފީޒުކުރުމަށް ގޮވާލައްވާނެކަމަށް ޚާރިޖީ ވުޒާރާއިން ވަނީ ހާމަކުރައްވާފައެވެ.

ފަލަސްޠީނު މައްސަލައާ ގުޅޭގޮތުން ރާއްޖެއިން ގެންގުޅޭ ސިޔާސަތު ހާމަކުރައްވައި، ފަލަސްޠީން މިނިވަން މުސްތަޤިއްލު ޤައުމެއްގެ ގޮތުގައި ދުނިޔެއިން ބަލައިގަތުމަށް މަސައްކަތްކުރުމަށް އޯ.އައި.ސީ.ގެ މެމްބަރު ޤައުމުތަކަށް އިލްތިމާސްކުރައްވާނެކަމަށްވެސް ވުޒާރާއިން ވަނީ ފާހަގަކުރައްވާފައެވެ.

އޯ.އައި.ސީ.އަކީ ދެގޮތެއްނުވެ ފަލަސްޠީނުގެ ހައްޤުގައި އަދި އިސްލާމީ އުންމަތަށް ދިމާވެފައިވާ ގޮންޖެހުންތަކަށް ހައްލުހޯދުމަށް ވަކާލާތުކުރަމުންދާ، 57 މެމްބަރު ޤައުމު ހިމެނޭ ޖަމުޢިއްޔާއެކެވެ. ދިވެހިރާއްޖެ އޯ.އައި.ސީ.ގެ މެމްބަރަކަށްވެފައިވަނީ 1976 އެވެ.

އޯ.އައި.ސީ. ބައްދަލުވުންތަކުގެ އިތުރުން ބައިނަލްއަޤުވާމީ އެކި މަންސަތަކުގައި ރާއްޖެއިން އަބަދުވެސް އަންނަނީ ފަލަސްޠީނުގެ ބިންތަކުގައި ޔަހޫދީން ހިންގަމުންދާ ލާއިންސާނީ ޢަމަލުތައް ކުށްވެރިކޮށް، ފަލަސްޠީނުގެ ރައްޔިތުންގެ ޙައްޤުގައި ވަކާލާތުކުރަމުންނެވެ.