އައްޑޫ ސިޓީގައި ފެނަކައިން ދެމުން އަންނަ ޙިދުމަތްތައް ޑިޖިޓަލައިޒްކޮށް ޒަމާނީ ފެންވަރުގެ ނިޒާމެއްގެ ދަށަށް ބަދަލުކޮށް، ޙިދުމަތް ދޭން ފަށާފައިވާ ކަމަށް ފެނަކައިގެ އިންފޮމޭޝަން ކޮމިއުނިކޭޝަންސް ޓެކްނޮލޮޖީ ޑިޕާޓްމެންޓުގެ ޑައިރެކްޓަރު މުހައްމަދު ސާމީން ވިދާޅުވެއްޖެއެވެ.

މީރުމާގައި މިއަދު ކުރިއަށް ދިޔަ "ވަށާރު" ހަފްލާގައި ފެނަކައިން އެކުލަވާލި އައު "ގިރުނބާ" ޕޯޓަލް އާއި ބެހޭ ގޮތުން މައުލޫމާތު ދެއްވަމުން ސާމީން ވިދާޅުވީ އައްޑޫ ސިޓީގައި ދެމުން އަންނަ ކަރަންޓާއި ބެހޭ ޙިދުމަތްތަކުގެ ހުރިހާ މައުލޫމާތެއް މި ޕޯޓަލް މެދުވެރިކޮށް ފެންނާނެ ކަމަށެެވެ. އެގޮތުން އައްޑޫ ސިޓީގައި ހުރި އިންޖީނުތަކުގެ އަދަދާއި، ހާލަތާއި، ކަރަންޓު އުފައްދާ ވަރާއި، އަޑީ ތެޔޮ ހުރި މިންވަރު ފަދަ މުހިއްމު މައުލޫމާތެއް މި ޕޯޓަލް މެދުވެރިކޮށް އެއް ސްކީރަކުން ފެންނަން ހުންނާނެ ކަމަށެވެ. އަދި މިހުރިހާ އިންޖީނެއްގެ މުހިއްމު މައުލޫމާތު ވަގުތުން ވަގުތަށް ހެޑް އޮފީޙަށް ލިބިގެންދާނެ ކަމަށް ވެސް ސާމީން ވަނީ ވިދާޅުވެފައެވެ.

ސާމީން ވިދާޅުވީ ފެނަކައިން މި އެކުލަވާލި ޑިޖިޓަލް މަގު ޗާޓުގެ ސަބަބުން އަވަސް މުއްދަތެއްގައި ރާއްޖޭގެ 150 ރަށެއްގައި ގާއިމްކޮށްފައިވާ އިންޖީނުގެތަކާއި، އިންޖީނުތަކާއި އަދި ޙިދުމަތުގެ މައުލޫމާތު ފަސޭހައިން ރައްކާކޮށް އަދި ފޯރުކޮށްދެވޭނެ ކަމަށެވެ. އަދި މިއީ ރަށް ރަށުގައި މަސައްކަތްކުރާ ފެނަކައިގެ މުވައްޒަފުންނަށާއި ޙިދުމަތް ހޯދާ ފަރާތްތަކަށް ލިބިގެންދާނެ ވަަރަށް ބޮޑު ފަސޭހައެއް ކަމަށް ވެސް ސާމީން ވިދާޅުވިއެވެ.

ސާމީން ވިދާޅުވީ ރަށްރަށުގައި ގާއިމްކޮށްފައިވާ ހުރި ފެން ޕްލާންޓްތަކުގެ މައުލޫމާތު ވެސް މި ޕޯޓަލް މެދުވެރިކޮށް ފެންނާނެ އިންތިޒާމެއް ވީހާ ވެސް އަވަހަށް ގާއިމް ކުރުމުގެ މަސައްކަތް ފަށާނެ ކަމަށެވެ. މި ޕޯޓަލް މެދުވެރިކޮށް ފެނަކައިގެ އިދާރީ ކަންކަމަށް ބޮޑެތި ފަސޭހަތައް ލިބޭނެކަމަށާއި އޭގެ އިތުރަށް ހުރި ހުރިހާ މައްސަލަތަކަށް ވެސް ހައްލެއް ލިބޭނެކަމަށް ސާމީން ވިދާޅުވިއެވެ. ސާމީން ވިދާޅުވީ ފެނަކަ ހިންގަން ދިމާވާ އެންމެ ބޮޑު ގޮންޖެހުމަކީ މުހިއްމު ލިޔެކިޔުންތައް އެއްތަނެއްގައި ރައްކާތެރިކޮށް ބަލަހައްޓައި ގެންގުޅުމުގެ ދަތިކަން ކަމަށާއި މިއަދު މިއެކުލަވާލި ނިޒާމުގެ ސަބަބުން ހުރިހާ މައުލޫމާތެއް ރައްކާތެރި ކަމާއި އެކު އެއްތަނަކުން ފެންނަން ހުންނާނެކަމަށެވެ.

ފެނަކައިން ވަނީ އައްޑޫ ސިޓީގައި 32 މެގަވޯޓް ގެ ޕަވާ ޕްލާންޓެއް އެޅުމަށް ޗައިނާގެ ތަޖުރިބާކާރު ކުންފުންޏަކާއި ހަވާލުކޮށް އެ މަސައްކަތުގެ އެއްބަސްވުމުގައި ސޮއިކޮށްފައެވެ. މި އެއްބަސް ވުމުގައި ސޮއިކުރީ މި އަހަރު އޭޕްރީލް މަހުގެ 18 ވަނަ ދުވަހުގައެވެ.