އިނގިރޭސި ޗެންޕިއަންޝިޕް ޕްލޭ އޮފް ފައިނަލްގައި ޝެފީލްޑް ޔުނައިޓެޑް 2-1 އިން ބަލިކޮށް، ސަންޑަރލޭންޑް 8 އަހަރު ފަހުން ޕްރީމިއަރ ލީގުގެ ޖާގައެއް ހޯދައިފިއެވެ.

މެޗުގެ ފުރަތަމަ ހާފުގައި ގުސްޓަވޯ ހަމަރުގެ ޕާހަކާއެކު ޓައިރީސް ކެމްބެލް ވަނީ ޝެފީލްޑް ޔުނައިޓެޑަށް ލީޑް ހޯދައިދީފައެވެ. އޭގެ 8 މިނެޓް ފަހުން ހެރިސަން ބަރޯސްގެ ވޮލީއަކުން ޝެފީލްޑްގެ ލީޑް އިތުރުކުރި ނަމަވެސް، ވީއޭއާރުން އެ ލަނޑު ބާތިލްކުރިއެވެ.

މެޗުގެ ފަހު ކުއާޓަރުގައި ޕެޓްރިކް ރޮބަޓްސްގެ ފުންޕާހަކާއެކު އެލިއެޒަރ މަޔެންޑާ ވަނީ ސަންޑަރލޭންޑަށް އެއްވަރުކޮށްދީފައެވެ. އިތުރުވަގުތާ ހަމައަށް ދިއުމުގެ ކުރިން، މެޗުގެ އިތުރުވަގުތުގައި 19 އަހަރުގެ ޓޮމް ވޯޓްސަން ވަނީ ޕެނަލްޓީ އޭރިއާއިން ބޭރުން ޖެހި ވަރުގަދަ ޝޮޓަކުން ސަންޑަރލޭންޑަށް މޮޅުވުމުގެ ލަނޑު ޖަހައިދީފައެވެ.

ރެޖިސް ލޭ ބްރިސްގެ ޓީމު ސަންޑަރލޭންޑް އެންމެ ފަހުން ޕްރީމިއަރ ލީގުގައި ކުޅުނީ 2016/17 ވަނަ އަހަރުގެ ސީޒަނުގައެވެ. އެއަށްފަހު 8 އަހަރު ވަންދެން ޗެމްޕިއަންޝިޕްގައި ހޭދަކުރުމަށްފަހު މިއަދު ވަނީ އިނގިރޭސި ފުޓުބޯޅައިގެ އެންމެ މަތީ ޑިވިޜަނަށް ނެގުމަށް ކާމިޔާބުކޮށްފައެވެ.

ސަންޑަރލޭންޑްގެ އިތުރުން ލީޑްސް އާއި ބާރންލީ ވަނީ އިނގިރޭސި ޕްރީމިއަރ ލީގަށް ކޮލިފައިވެފައެވެ.