މެންޗެސްޓަރ ސިޓީ ބޯންމަތު އާ ކުޅުނު މެޗުން 3-1 އިން މޮޅުވެ، ޕްރިމިއަރ ލީގުގެ ތިންވަނަ އަށް އަރައިފިއެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗަކީ ކެވިން ޑި ބްރޫނާ އިއްތިހާދުކުޅޭނެ އެންމެ ފަހުމެޗެވެ. ސީޒަން ނިމުމަށްފަހު ސިޓީ ދޫކޮށްލާކަން ޑި ބްރޫނާ މީގެކުރިން ވަނީ ހާމަކޮށްފައެވެ. ޑި ބްރޫނާ ދަނީ އަދި ކޮންކްލަބަކަށްކަން އަދި ހާމަކޮށްފައި ނުވާއިރު، އަންނަ ސީޒަނުގައި ސަޢޫދީގެ ޓީމަކުން ޑެބްރޫނާ ފެނުން ގާތެވެ.

Ad by Hajj Corporation

ރޭގެ މެޗުގައި މިސީޒަނުގެ ބޮޑު ބައެއްގައި އޭސީއެލް އަނިޔާގައި ހުރި ރޮޑްރީ އަނިޔާއިން ސަލާމަތްވެ، 240 ދުވަސްފަހުން ކުޅުމުގެ ތެރެއަށް އަނބުރާ ވަނީ ނިކުމެފައެވެ.

ދެޓީމަސްވެސް ދެވަނަ ހާފުގައި ރަތްޚާޑު ފެނިގެންދިޔަ މިމެޗުގެ ފުރަތަމަ ގޯލު ކާމިޔާބުކޮށްދިނީ ސިޓީގެ މިސްރުގެ ފޯވާޑް އޮމަރ މަރްމޫޝްއެވެ. އަދި ފުރަތަމަ ހާފު ނިމުމުގެ ކުރިން ބަނާޑޯ ސިލްވާ ސިޓީގެ ދެވަނަ ލަނޑު ޖެހިއެވެ.

ސިޓީގެ ފަހުގޯލު ކާމިޔާބުކޮށްދިނީ މިދިޔަ ޖަވަނަރީގައި ސިޓީއާއި ގުޅުނު ނިކޯ ގޮންޒާލެޒް އެވެ. މިއީ ސިޓީގެ ޖޯޒީގައި އޭނާޖެހި ފުރަތަމަ ގޯލެވެ. މެޗުގެ ފަހުވަގުތުގައި ބޯންމައުތުް އިންވެސް ވަނީ ގޯލެއް ޖަހާފައެވެ.

ރޭގެ މެޗުގެ ފުރިހަމަ ވަގުތު ހަމަވީ 3-1 އިންނެވެ. މިސީޒަނުގައި އާދަޔާ ޚިލާފު ދަށްނަތީޖާތަކެއް ހޯދި ސިޓީއިން ސީޒަން ހުސްއަތާ ނިންމާލިއިރު، އަންނަ ސީޒަނުގައި ޗެންޕިއަންސް ލީގުގެ ޖާގައެއް ހޯދުމަކީ ޓީމުގެ މިހާރުގެ އެންމެ ބޮޑު އަމާޒެވެ. ރޭޣެ މޮޅާއެކު ޕްރީމިއަރ ލީގުގެ އެންމެ ފަހުމެޗަށް ސިޓީ ނިކުންނައިރު އަންނަ ސީޒަނުގެ ޗެންޕިއަންސް ލީގުގެ ޖާގައެއް ކަށަވަރުކުރުމަށް ސިޓީއަށް ދެން ބޭނުންވަނީ އެންމެ ޕޮއިންޓެކެވެ.