އިނގިރޭސި ޕްރިމިއާ ލީގުގައި ރޭ ކުޅުނު މެޗުގައި ފުލަމްގެ މައްޗަށް 3-0 ގެ ނަތީޖާއަކުން ކާމިޔާބު ހޯދައި، ތާވަލުގެ އެއްވަނާގައި އޮތް އާސެނަލްއާ ދެމެދު އޮތް ފަރަގު މެންޗެސްޓަރ ސިޓީން ތިން ޕޮއިންޓަށް ކުޑަކޮށްފިއެވެ. އިއްތިހާދު ސްޓޭޑިއަމްގައި ކުޅުނު މި މެޗުގައި ސިޓީގެ ލަނޑުތައް ކާމިޔާބުކޮށްދިނީ އެންޓޮއިން ސެމެންޔޯ، ނިކޯ އޯރައިލީ އަދި އާލިން ހާލަންޑެވެ.

މެޗުގެ ފުރަތަމަ މިނެޓުން ފެށިގެން ސިޓީން ކުޅުން ކޮންޓްރޯލް ކުރިއިރު، ފުރަތަމަ ލަނޑު ފެނިގެންދިޔައީ 24 ވަނަ މިނެޓުގައެވެ. މަތިއަސް ނޫނޭޒް ނެގި ހުރަހެއް ފުލަމްގެ ސަންޑަރ ބާޖްގެ ގައިގައި ޖެހިފައި ލިބުމުން، ސެމެންޔޯ ވަނީ އެ ފުރުސަތުގެ ބޭނުން ހިފާ ގޯލުގެ ތެރެއަށް ބޯޅަ ފޮނުވާލާފައެވެ. އޭގެ ހަ މިނެޓު ފަހުން، ސެމެންޔޯ ދިން ބޯޅައަކުން ޒުވާން ކުޅުންތެރިޔާ ނިކޯ އޯރައިލީ ވަނީ ސިޓީގެ ދެވަނަ ލަނޑު ޖަހައިދީފައެވެ.

Ad by Hajj Corporation

ސިޓީގެ ތިންވަނަ ލަނޑު މެޗުގެ 39 ވަނަ މިނެޓުގައި ކާމިޔާބުކޮށްދިނީ ތަރި އާލިން ހާލަންޑެވެ. މިއީ މިދިޔަ ޑިސެމްބަރު މަހުގެ 20 ވަނަ ދުވަހުގެ ފަހުން ލީގުގައި އޭނާ ކާމިޔާބުކުރި ފުރަތަމަ އޯޕަން-ޕްލޭ ގޯލެވެ. މި ލަނޑާއެކު ފުރަތަމަ ހާފު ނިމުނުއިރު ސިޓީން އޮތީ ތިން ލަނޑުގެ ލީޑެއްގައެވެ. ދެވަނަ ހާފަށް ހާލަންޑުގެ ބަދަލުގައި އޮމަރު މާމޫޝް ކުޅެން އެރިއިރު، ސިޓީން ވަނީ އިތުރު ލަނޑެއް ޖެހުމަށް މަސައްކަތް ކޮށްފައެވެ.

ދެވަނަ ހާފުގައި މެޗުގެ ފޯރި ކުޑަކޮށް ދަށްވި ނަމަވެސް، ފުލަމްގެ އެމީލް ސްމިތު ރޯ، ރޮޑްރިގޯ މުނިޒް އަދި ޖޯޝް ކިންގް ވަނީ ސިޓީގެ ގޯލަށް ނުރައްކާ ކުރަން މަސައްކަތް ކޮށްފައެވެ. ނަމަވެސް ސިޓީގެ ކީޕަރު ޑޮނަރުއްމާ ވަނީ އެ ހަމަލާތައް ހުށިޔާރުކަމާއެކު ދިފާއުކޮށް، ބައިކޮޅަށް ލަނޑެއް ވަނަނުދީ ހިފަހައްޓާފައެވެ.

މި މޮޅާއެކު ސިޓީން ވަނީ ފުލަމްއާ ދެކޮޅަށް ޖެހިޖެހިގެން 17 މެޗުން މޮޅުވެ، އިނގިރޭސި ލީގު ތާރީޚުގައި ޓީމަކުން އަނެއް ޓީމެއްގެ މައްޗަށް ހޯދި އެންމެ ދިގު މޮޅުވުމުގެ ރެކޯޑު ދަމަހައްޓާފައެވެ. އަދި މި ނަތީޖާއާއެކު ތާވަލުގެ އެއްވަނާގައި އޮތް އާސެނަލްއަށް ވަނީ ޕްރެޝަރު ބޮޑުވެފައެވެ. އާސެނަލް ދެން ނުކުންނާނީ ބުރާސްފަތި ދުވަހު ބްރެންޓްފޯޑާ ދެކޮޅަށެވެ.