ޕްރިމިއަރ ލީގުގެ ގަވާއިދު އެލް.33 އާ ޚިލާފުވުމުގެ ސަބަބުން މެންޗެސްޓަރ ސިޓީއަށް 1.08 މިލިއަން ޕައުންޑުގެ ޖޫރިމަނާއެއް ކޮށްފިއެވެ. މިއީ ފާއިތުވި ސީޒަނުގައި 9 މެޗެއްގައި ޖުމްލަ 18 މިނެޓާއި 53 ސިކުންތު މެޗު ފެށުމާއި، ދެވަނަ ހާފުގައި އަލުން ފެށުމުގައި ލަސްވުމުގެ ސަބަބުން ކުރެވުނު ޖޫރިމަނާއެކެވެ.

މި ޖޫރިމަނާތަކަކީ ޕްރިމިއަރ ލީގާއި މެންޗެސްޓަރ ސިޓީއާ ދެމެދު ވެވުނު އެއްބަސްވުމެއްގެ ދަށުން ކުރެވުނު ޖޫރިމަނާތަކެކެވެ. އަދި ކްލަބުން މިކަމަށް މަޢާފަށް އެދި، ކުޅުންތެރިންނާއި މުވައްޒަފުންނަށް ގަވާއިދުތަކާ އެއްގޮތަށް ޢަމަލުކުރުމުގެ މުހިންމުކަން ހަނދާންކޮށްދީފައިވެއެވެ.

މީގެ ތެރޭގައި އެންމެ ބޮޑު ޖޫރިމަނާއެއްގެ ގޮތުގައި 210,000 ޕައުންޑުގެ ޖޫރިމަނާއެއް ކޮށްފައިވަނީ ޖެނުއަރީ 19 ގައި އިޕްސްވިޗް ޓައުންއާ ދެކޮޅަށް ކުޅުނު މެޗުގައި 2 މިނެޓާއި 22 ސިކުންތު ލަސްވުމުގެ ސަބަބުންނެވެ. އަދި އެންމެ ކުޑަ ޖޫރިމަނާއެއްގެ ގޮތުގައި 40,000 ޕައުންޑުގެ ޖޫރިމަނާއެއް ކޮށްފައިވަނީ އޮކްޓޯބަރ 26 ގައި ސަދަމްޕްޓަންއާ ދެކޮޅަށް ކުޅުނު މެޗުގައި 2 މިނެޓާއި 10 ސިކުންތު ލަސްވުމުގެ ސަބަބުންނެވެ.

މިއީ މެންޗެސްޓަރ ސިޓީއަށް މިފަދަ ޖޫރިމަނާއެއް ކުރި ފުރަތަމަ ފަހަރެއް ނޫނެވެ. ފާއިތުވިސީޒަނުގައިވެސް މިފަދަ ކަންކަމާ ގުޅިގެން 2.09 މިލިއަން ޕައުންޑުގެ ޖޫރިމަނާއެއް ކޮށްފައިވެއެވެ.

ޕްރިމިއަރ ލީގުން ބުނެފައިވަނީ މުބާރާތުގެ ޕްރޮފެޝަނަލް މިންގަނޑު ހިފެހެއްޓުމަށާއި، ބްރޯޑްކާސްޓް ޝެޑިއުލްތައް ހިފެހެއްޓުމަށްޓަކައި މުބާރާތިގައި ހެދިފައިވާ ޤަވާއިދު ތަކަށް ޓީމުތަކުން ބޯލެނބުމަކީ ކޮންމެހެން މުހިންމުކަމެއް ކަމަށެވެ.