މެންޗެސްޓަރ ޔުނައިޓެޑަށް އާސެނަލް އާދެކޮޅަށް ކުޅެ މިދިޔަ ހަފްތާގައި ބަލިވިނަމަވެސް، އަދިވެސް އާސެނަލްގެ ހިޔަނިން ސަލާމަތެއް ނުވެއެވެ.

ޕްރީމިއަރ ލީގުގެ ދެވަނަ ރައުންޑުގައި ޔުނައިޓެޑް ލީޑު ނަގާފައިވަނިކޮށް، ދެވަނަ ހާފުގައި ކުލެން ނިކުތް އާސެނަލްގެ އެކަޑެމީ ކުޅުންތެރިޠާ ސްމިތް ރޯވް ޖެހި ގޯލާއެކު ޔުނައިޓެޑުގެ ސީޒަނުގެ ދެވަނަ މެޗުވެސް ނިންމާލަންޖެހުނީ މޮޅެއް ނުލިބިއެވެ.

Ad by Hajj Corporation

މެޗުގެ ފުރަތަމަ ހާފުގައި ޔުނައިޓެޑަށް ލިބުނު ޕެނަލްޓީ ކެޕްޓަން ބްރޫނޯ ފެނާންޑޭސް ގޯލުން މަތިން ޖެހުމުން މެޗުގެ ކޮންޓްރޯލް ހޯދުމުގެ ފުރުސަތު ގެއްލުނެވެ. މި ޕެނަލްޓީ ލިބުނީ ވީއޭއާރުގެ އެހީގައި ފުލަމްގެ ކެލްވިން ބަސީ މޭސަން މައުންޓަށް ފައުލްކުރި ކަމަށް ނިންމުމުންނެވެ.

މެޗުގެ 60 ވަނަ މިނެޓްގައި ޖެހި ޔުނައިޓެޑުގެ ހަމައެކަނި ގޯލަކީ ލިބުނު ކޯނަރަކުން ފުލަމްގެ ކުޅުންތެރިއެއްގެ ގައިގައި ޖެހިފައި ބައިކޮޅަށް ވަތް ގޯލެކެވެ. މެޗުގެ ދެވަނަ ހާފުގެ 71 ވަނަ މިނެޓުގައި ކުޅެން ނިކުތް ސްމިތް ރޯވް ވަނީ އެންމެ ތިން މިނެޓުތެރޭގައި ގޯލެއް ޖަހައި މެޗުގެ ނަތީޖާ ބަދަލުކޮށްލާފައެވެ.

ޔުނައިޓެޑްގެ އެޓޭކިން ވަރަުގަދަ ކުރުމަށް މި ޓްރާންސްފާ ވިންޑޯގައި މިހާތަނަށް 264 މިލިޔަން ޚަރަދުކޮށްފައިވާއިރު، މިހާތަނަށް ކުޅުނު ދެމެޗުންވެސް ޔުނައިޓެޑްގެ ކުޅުންތެރިއަކަށް ގޯލެއް ޖެހިފައެއް ނުވެއެވެ.

މި ނަތީޖާއާ އެކު ޔުނައިޓެޑަށް މިހާތަނަށް މިސީޒަނުގައި ކުޅެވުނު ފުރަތަމަ ދެ މެޗުން އެންމެ ޕޮއިންޓެއް ލިބިފައިވާއިރު، ޔުނައިޓެޑް މިވަޤުތު އޮތީ ތާވަލުގެ 16 ވަނައިގައެވެ.