ޗެލްސީން ފުލްހަމްއާ ދެކޮޅަށް ކުޅުނު މެޗުން 2-0 އިން މޮޅުވެ، ޕްރިމިއަރ ލީގުގެ ޕޮއިންޓް ޓޭބަލްގެ އެއްވަނަ އަށް ޖެހިލައިފިއެވެ. ނަމަވެސް މި މެޗުގައި ވީ.އޭ.އާރު ނިންމުންތަކާ ގުޅިގެން ބޮޑެތި ޚިޔާލު ތަފާތުވުންތަކެއް ވަނީ އުފެދިފައެވެ.

މެޗުގެ 21 ވަނަ މިނެޓުގައި ޖޮޝް ކިންގް ވަނީ ފުލްހަމްއަށް ލީޑު ހޯދައިދިން ގޯލެއް ޖަހާފައެވެ. ނަމަވެސް މި ގޯލު ވަނީ ވީ.އޭ.އާރުގެ އެހީގައި ބާތިލްކޮށްފައެވެ. އެއީ ގޯލުގެ ކުރިން ރޮޑްރިގޯ މުނިޒް، ޓްރެވޯ ޗަލޮބާއާ ދެކޮޅަށް ކުރި ފައުލެއްގެ ސަބަބުންނެވެ. ރެފްރީ ރޮބް ޖޯންސް ވީ.އޭ.އާރު ސްކްރީނުން މި މަންޒަރު ބެލުމަށްފަހު ގޯލު ބާތިލްކުރި ނިންމުމަކީ ފުލްހަމްގެ ފުރަތަމަ ހާފުގެ މޮޅު ކުޅުމަށް ލިބުނު ބޮޑު ހީނަރުކަމެކެވެ.

Ad by Hajj Corporation

ހާފްޓައިމްގެ ކުރިން ޗެލްސީގެ ބްރެޒިލްގެ ފޯވާޑް ޖޮއާއޯ ޕެޑްރޯ ވަނީ ބޮލުން ގޯލެއް ޖަހައި ލީޑު ނަގައިދީފައެވެ. އަދި ދެވަނަ ހާފުފެށިގެން ކުރީކޮޅުގައި ވީ.އޭ.އާރުގެ ނިންމުމަކުން ޗެލްސީއަށް ޕެނަލްޓީއެއް ލިބުނެވެ. އެއީ ރަޔަން ސެސެގްނޮން ގެ އަތުގައި ބޯޅަޖެހިގެންނެވެ. ނަމަވެސް ރިޕްލައި އިން ފެންނަގޮތުން އޭގެ ކުރިން ޗެސްލީގެ ޖޯއާއޯ ޕެޑްރޯގެ އަތުގައިވެސް ޖެހެއެވެ. ގިނަވަގުތުތަކެއްގައި ވީއޭއާރު ޗެކްކުރުމަށްފަހު ލިބުނު ޕެނަލްޓީގައި ކެޕްޓަން ފެނާންޑޭޒް ވަނީ ގޯލުޖަހައި މެޗުގެ ތިން ޕޮއިންޓް ހޯދައިދީފައެވެ.

މީގެ އިތުރުން މިމެޗު ހިނގަމުންދިޔަ ވަގުތުގައި ޗެލްސީއާއި އަލަށް ގުޅުމަށް ހަމަޖެހިފައިވާ މެންޗެސްޓަރ ޔުނައިޓެޑްގެ ގަރނަޗޯ ވަނީ ޗެސްލީގެ ސްޓެމްފޯޑް ބްރިޖުން ފެނިފައެވެ. މިކުޅުންތެރިޔާ ޗެލްސީއަށް ސޮއިކުރިކަން މިހާރުވަނީ އިޢުލާނުކޮށްފައެވެ. އާޖެންޓީނާގެ މި ކުޅުންތެރިޔާގެ ސޮއިކުރުމާއެކު ޗެލްސީގެ ސަޕޯޓަރުންގެ މެދުގައި ވަރަށް ބޮޑު އުންމީދުތަކެއް އުފެދިފައިވެއެވެ.