ބްރެޒިލްގެ ޤައުމީ ޓީމުގެ އައު ކޯޗު ކާލޯ އެންޗެލޯޓީ ވަނީ ކުރިއަށް އޮތް ދެކުނު އެމެރިކާގެ ވޯލްޑް ކަޕް ކޮލިފައިންގ މެޗުތަކަށް ޓީމުގެ ސްކޮޑް އިޢުލާންކޮށްފައެވެ. އެކުއަޑޯ އަދި ޕެރަގުއޭ އާ ދެކޮޅަށް ކުޅޭ މެޗުތަކަށް އިޢުލާންކުރި ސްކޮޑުގައި ސުޕަރ ސްޓާރ ނޭމާ އާއި ރޮޑްރީގޯ ނުހިމެނެއެވެ.

މިދިޔަ އާދިއްތަ ދުވަހު ބްރެޒިލްއަށް ޒިޔާރަތްކުރި އިޓަލީގެ ކޯޗު އެންޗެލޯޓީ ވަނީ ޔޫރަޕިއަން ފުޓްބޯޅައިން އޭނާއަށް ރަނގަޅަށް ދަންނަ ގިނަ ކުޅުންތެރިން މި ސްކޮޑަށް ހޮވާފައެވެ. މީގެ ތެރޭގައި ރިއަލް މެޑްރިޑްގެ ވިނިސިއަސް ޖޫނިއަރ އަދި މެންޗެސްޓަރ ޔުނައިޓެޑްގެ ކަސެމީރޯ ހިމެނެއެވެ.

Ad by Hajj Corporation

މި އަހަރު ރަނގަޅު ފޯމެއްގައި ހުރި އެންޓޮނީ އަލުން ސްކޮޑަށް ގެނެސްފައިވާއިރު، ޕަލްމޭރާސްގެ 18 އަހަރުގެ ޒުވާން ކުޅުންތެރިއެއް ކަމަށްވާ އެސްޓެވާއޯ ވެސް ވަނީ ފުރަތަމަ ފަހަރަށް ސްކޮޑަށް ހޮވިފައެވެ. އެންޗެލޯޓީގެ ސްކޮޑުގައި ތަޖުރިބާކާރު އަދި ޒުވާން ކުޅުންތެރިންގެ ރަނގަޅު ބެލެންސެއް ހިފަހައްޓާފައިވެއެވެ.

ގޯލްކީޕަރުންގެ ގޮތުގައި އަލިސަން، ބެންޓޯ އަދި ހޫގޯ ސޯޒާ ހިމެނޭއިރު، ޑިފެންޑަރުންގެ ގޮތުގައި އެލެކްސް ސާންޑްރޯ، ކާލޯސް އަގުސްޓޯ، ވެސްލީ، ވަންޑަރސަން، އެލެކްސާންޑްރޯ ރިބޭރޯ، ބެރާލްޑޯ، މާކިންހޮސް، ލިއޯ އޯޓިޒް އަދި ދަނީލޯ ހިމަނާފައިވެއެވެ.

މިޑްފީލްޑަރުންގެ ގޮތުގައި އެންޑްރޭސް، އެންޑްރޭ، އެޑަރސަން، ބްރޫނޯ ގުއިމަރާއެސް، ކަސެމީރޯ އަދި ގަރސަން ހިމެނޭއިރު، ފޯވަޑް ޕޮޒިޝަންގައި އެސްޓެވާއޯ، އެންޓޮނީ، ގެބްރިއެލް މާޓިނެލީ، މަތެއުސް ކުންހާ، ވިނިސިއަސް ޖޫނިއަރ، ރަފީންހާ އަދި ރިޗަލިސަން ހިމަނާފައިވެއެވެ.