އިނގިރޭސި ޤައުމީ ޓީމުގެ އެފްރިކާގެ ޤައުމެއްކަމަށްވާ ސެނެގާލް އަތުން ފްރެންޑްލީ މެޗެއްގައި ބަލިވެއްޖެއެވެ.

ނޮޓިންގަމް ފޮރެސްޓްގެ ސިޓީ ގްރައުންޑްގައި ކުޅުނު މި މެޗުގައި ހެރީ ކޭން ވަނީ 7 ވަނަ މިނެޓްގައި އިނގިރޭސި ޓީމަށް ލީޑު ހޯދައިދީފައެވެ. ނަމަވެސް އިސްމާއިލާ ސަރް، ހަބީބް ދިއާރާ އަދި ސަބްސްޓިޓިއުޓް ޗެއިކް ސަބަލީގެ ލަނޑުތަކާއެކު ސެނެގަލްވަނީ އިނގިރޭސި ޓީމު ބަލިކޮށް ތާރީޚީ ކާމިޔާބީއެއް ހޯދާފައެވެ. މިއީ އެފްރިކާގެ ޓީމަކުން އިނގިރޭސި ޓީމު ބަލިކުރި ފުރަތަމަ ފަހަރެވެ. މިމެޗު ސެނެގާލް އިން ކާމިޔާބުކުރީ 3-1 އިންނެވެ.

އެންޑޯރާއާ ދެކޮޅަށް ކުޅުނު މެޗަށްފަހު 10 ބަދަލާއެކު އެކުލަވާލި ފުރަތަމަ 11 ގައި ކުޅުނު މި މެޗުގައި، ޖޫޑް ބެލިންގަމްގެ ލަނޑު ވީއޭއާރުން ބާތިލްކުރުމާ ގުޅިގެން އިނގިރޭސި ޓީމުގެ ސަޕޯޓަރުން ވަނީ ޓީމަށް ފާޑުކިޔާފައެވެ.

އިނގިރޭސި ޓީމުގެ ކުރީގެ ކޯޗު ގެރެތް ސައުތްގޭޓްގެ ދަށުން ޔޫރޯ ޗެމްޕިއަންޝިޕްގެ ފައިނަލަށާއި ވޯލްޑް ކަޕްގެ ސެމީ ފައިނަލަށް ގޮސްފައިވާ އިނގިރޭސި ޓީމުގެ މައްޗަށް ސަޕޯޓަރުން ކުރާ އުއްމީދުތައް ބޮޑުކަމަށް ޓުޗެލް ފާހަގަކުރެއްވިއެވެ. އަދި ސެޕްޓެމްބަރުގައި ކުޅޭ މެޗުތަކުގައި ޓީމު ވާދަވެރިވާނެ ކަމަށް އޭނާ ވިދާޅުވިއެވެ.
އިނގިރޭސި ފުޓްބޯޅަ ޓީމަށް ފަހުގެ ތާރީޚުގައި ބޮޑެތި މުބާރާތްތަކުގައި މާބޮޑު ކާމިޔާބީއެއް ލިބިފައި ނުވާއިރު، ވޯލްޑްކަޕް ފެށެން މިހާރުމިވަނީ އަހަރަކަށްވެފައެވެ.