މި އަހަރުގެ ސަމަރ ޓްރާންސްފަރ ވިންޑޯގައި ގްޔޯކެރޭޝް ދޫކޮށްނުލައިފިނަމަ ސްޕޯޓިންގ އަށް ދެން އެއްވެސް މެޗެއް ނުކުޅޭނެ ކަމަށް ވިކްޓަރ ގިއޯކެރެސް އިންޒާރުދީފިއެވެ.
ގްޔޯކެރޭޝް ވަނީ މިދިޔަ ސީޒަނުގައި ޕޯޗުގަލްގެ ސްޕޯޓިންގ އަށް 52 މެޗުން 54 ގޯލާއެކު 13 އެސިސްޓްހަދައި، ނިމިދިޔަ ސީޒަނުގެ ޔޫރަޕުގެ އެންމެ މޮޅު ސްޓްރައިކަރުންގެ ތެރޭގައި ހިމެނިފައެވެ.

ސްވިޑަންގެ 27 އަހަރުގެ މިކުޅުންތެރިޔާގެ ސޮއި ހޯދުމަށް ވޭތުވެދިޔަ ދުވަސްތަކުގައި ގިނަ ކުލަބުތަކުން ޝައުޤުވެރިކަން ފާޅުކޮށްފައިވާއިރު، ސޮއި ހޯދުމުގެ ރޭހުގައި މިވަގުތު ކުރީގައި އޮތީ މެންޗެސްޓަރ ޔުނައިޓެޑާއި އާރސެނަލްއެވެ. އާރސެނަލް އިން ލައިޕްޒިގް ގެ ފޯވާޑް ބެންޖަމިން ސެސްކޯގެ ސޮއި ހޯދުމާއި ގާތުގައި ވާކަމަށް ގިނަ މީޑިޔާތަކުން ރިޕޯޓްކޮށްފައިވާއިރު، މިވަގުތު ގްޔޯކެރޭޝްގެ ސޮއި ހޯދުމުގެ އެންމެ ކުރީގައި އުޅެނީ ޔުނައިޓެޑެވެ.

59 މިލިއަން ޕައުންޑަށް އޭނާ ދޫކޮށްލުމަށް ސްޕޯޓިންގ އާއެކު "ޖެންޓްލްމަން އެގްރީމެންޓެއް" އޮތް ކަމަށް ގިއޯކެރެސް ގަބޫލުކުރާ ކަމަށް މަޢުލޫމާތު ލިބިފައިވެއެވެ. މިގޮތަށް ކުލަބުންވެސް މީގެ ކުރިން އެއްބަސްވެފައިވާއިރު، ސްޕޯޓިންގް ގެ ސްޕޯޓްސް ޑިރެކްޓަރު މަޤާމުން އިސްތިއުފާ ދިންފަހުން ކުލަބުގެ ރައީސްގެ ރާގު މިހާރުވަނީ މުޅިން ބަދަލުވެފައެވެ. އަދި ކުލަބުން މިހާރު އޭނާ ވިއްކާލުމަށް ޑިމާންޑްކުރާ އަދަދު 80 މިލިޔަން ޕައުންޑް އަށް އަރާނެކަމަށް ބެލެވެއެވެ.

ސްޕޯޓިންގގެ ރައީސް ވަނީ މިފަދަ އެއްބަސްވުމެއް އޮތް ކަމަށް ދެކޮޅު ހަދައި، "އިންޒާރާއި ބިރުދެއްކުމުން މަސައްކަތެއް ނުކުރާނެ" ކަމަށް ބުނެފައެވެ. މި ބަސްތަކުން ގިއޯކެރެސް ވަނީ ވަރަށް ބޮޑަށް ރުޅިއައިސްފައި ކަމަށް ވެސް ވަނީ ރިޕޯޓުކޮށްފައެވެ.

ގްޔޯކެރޭޝް ވަނީ މިކަމާއި ހިތްހަމަނުޖެހި، ކުލަބުގެ ރައީސްއަށް ޕްރެޝަރ ކުރުމަށް ކުރިޔަށް އޮތް ސީޒަނުގައި ޓީމުގެ ޕްރެކްޓިސްތަކުގައި ބައިވެރިނުވާނެކަމަށް ރިޕޯޓްތައް ބުނެއެވެ.