އައިންޓްރެކްޓް ފްރޭންކްފަރޓްގެ ސްޓްރައިކަރު ހިއުގޯ އެކިޓިކެ ގެ ސޮއި ހޯދުމަށް ލިވަޕޫލުން ތައްޔާރުވެއްޖެއެވެ.

އެކިޓިކޭގެ ސޮއި ހޯދުމުގައި ނިއުކާސަލް ކުރީގައިވަނިކޮށް ލިވަޕޫލުން ވަނީ މިކުޅުންތެރިޔާގެ ރޭހުގައި ކުރިހޯދާފައެވެ. 23 އަހަރުގެ ފްރާންސްގެ މި ކުޅުންތެރިޔާމިހާރުވަނީ ލިވަޕުލާއެކު 6 އަހަރުގެ އެއްބަސްވުމެއްގައި ސޮއިކުރުމަށް އެއްބަސްވެފައެވެ. މިހާރު މިދަނީ ދެކުލަބު ދެމެދުގައި އަގު ކަނޑައެޅުމުގެ މަސައްކަތެވެ.

އެކިޓިކެގެ ރިލީސް ކްލޯޒްގެ އަގަކީ 86.5 މިލިއަން ޕައުންޑެވެ. ނަމަވެސް ލިވަރޕޫލުން އުއްމީދު ކުރަނީ މި އަދަދަށްވުރެ ކުޑަ އަގެއްގައި އޭނާ ގެނެވޭތޯއެވެ.

މިއީ މި ސީޒަންގައި ލިވަޕޫލުން ސޮއި ހޯދާ ފަސްވަނަ ކުޅުންތެރިޔާއެވެ. މީގެ ކުރިން އިނގިރޭސި ރެކޯޑު އަގު ކަމުގައިވާ 116 މިލިއަން ޕައުންޑަށް ބަޔަރ ލެވަކޫޒަންގެ ފްލޯރިއަން ވަރޓްޒް އަދި ހަމަ އެ ކުލަބުން ޖެރެމީ ފްރިމްޕޮންގް ވަނީ ގެނެސްފައެވެ. މީގެ އިތުރުން ބޯންމައުތުން 40 މިލިއަން ޕައުންޑަށް މިލޮސް ކެރްކެޒްގެ ސޮއި ހޯދާފައިވާއިރު ވެލެންސިއާގެ މާމަދުއަޝްވިލީގެ ސޮއިވެސް ލިވަޕޫލުން ވަނީ ހޯދާފައެވެ.

އެކިޓިކެ ވަނީ މިދިޔަ ސީޒަނުގައި 48 މެޗުން 22 ގޯލާއެކު 12 އެސިސްޓް ހަދާފައެވެ. އެކިޓިކެގެ ސޮޔާއެކު ލިވަޕޫލްގެ މި ސީޒަންގެ ހޭދަ 250 މިލިއަން ޕައުންޑަށްވުރެ މައްޗަށް ދާނެއެވެ.