ރިއަލް މެޑްރިޑްގައި 13 އަހަރު ހޭދަކުރުމަށްފަހު ކުލަބާއި އަލްވަދާޢުކިޔުމަށްފަހު ކްރޮއޭޝިއާގެ ކެޕްޓަން ލޫކާ މޮޑްރިޗް، އިޓަލީގެއޭސީ މިލާނާއެކު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ. މި އެއްބަސްވުން 2027 ވަނަ އަހަރުގެ ޖޫން މަހާ ހަމައަށް އިތުރުކުރުމުގެ ފުރުސަތު އޮންނާނެއެވެ.

39 އަހަރުގެ މިޑްފީލްޑަރު މިލާނަށް ބަދަލުވެއްޖެކަން ކްލަބުގެ އައު ކޯޗު މެކްސިމިލިއަނޯ އެލެގްރީ މި މަހުގެ ކުރީކޮޅު ކަށަވަރުކޮށްދިނެވެ. މޮޑްރިޗް މިލާނުގައި ކުޅޭނީ ނަންބަރު 14 ޖާޒީގައެވެ.

Ad by Hajj Corporation

ފުޓްބޯޅަ ތާރީހުގެ އެންމެ މޮޅު މިޑްފީލްޑަރުންގެ ތެރޭގައި ހިމެނޭ މޮޑްރިޗް، ރިއަލް މެޑްރިޑުން ދޫކޮށްލާނެކަން މޭ މަހު އިއުލާނުކުރިއެވެ. އޭނާ ރިއަލް މެޑްރިޑަށް 597 މެޗެއް ކުޅެ، ހަތަރު ލަ ލީގާ އަދި ހަ ޗެމްޕިއަންސް ލީގް ޓައިޓަލް ހިމެނޭ ގޮތަށް ޖުމްލަ 28 މުހިންމު ޓްރޮފީ ހޯދައިދީފައިވެއެވެ.

ކްރޮއޭޝިއާގެ މިހާތަނަށް އުފެދުނު އެންމެ މޮޅު ކުޅުންތެރިއާގެ ގޮތުގައި ބެލެވޭ މޮޑްރިޗް ވަނީ ގައުމީ ޓީމަށް 188 މެޗު ކުޅެ 28 ލަނޑު ޖަހާފައެވެ. 2018 ވަނަ އަހަރުގެ ވޯލްޑް ކަޕްގައި ކްރޮއޭޝިއާ ފުރަތަމަ ފަހަރަށް ފައިނަލަށް ގެންދިއުމުގައި އިސް ދައުރެއް އަދާކޮށް، އެ މުބާރާތުގެ ގޯލްޑަން ބޯލް (މޮޅުކުޅުންތެރިޔާ) ހޯދިއެވެ. އަދި ހަމަ އެ އަހަރު ބެލަން ޑި އޯވެސް ހޯދައި، 2007 އިން ފެށިގެން ލިއޮނެލް މެސީ އަދި ކްރިސްޓިއާނޯ ރޮނާލްޑޯ ނޫން އެހެން ކުޅުންތެރިއަކު އެ އެވޯޑް ހޯދި ފުރަތަމަ ކުޅުންތެރިޔާއަށްވެސް ވެގެންދިޔައީ މޮޑްރިޗްއެވެ.