ޗެކިއާއިން އެއްވަރުކޮށްފައި ވަނިކޮށް، މެޗުގެ ފަހުކޮޅު ޖެހި ލަނޑާއެކު 2-1 އިން މޮޅުވެ، ކްރޮއޭޝިއާއިން ނޭޝަންސް ލީގުގެ ގްރޫޕް އޭ3 ގެ ފުރަތަމަ ތިން ޕޮއިންޓް ކަށަވަރުކޮށްފިއެވެ. ޕްރާގްގައި ކުޅުނު މި މެޗުގައި ކްރޮއޭޝިއާގެ ކެޕްޓަން ލޫކާ މޮޑްރިޗް ވަނީ ތާރީޚީ ރެކޯޑެއް ހަދާފައެވެ.

ދެވަނަ ހާފު ފެށިގެން 47 ވަނަ މިނެޓުގައި ޕެނަލްޓީ އޭރިއާ ބޭރުން ލިބުނު ބޯޅަ، ކަނާތު ފައިން ގޯލުގެ ތެރެއަށް ފޮނުވާލައިގެން މޮޑްރިޗް ވަނީ ކްރޮއޭޝިއާއަށް ލީޑު ނަގައިދީފައެވެ. އުމުރުން 41 އަހަރުގައި އޭނާ ޖެހި މި ލަނޑާއެކު، މޮޑްރިޗް ވެގެން ގޮސްފައިވަނީ ކްރޮއޭޝިއާގެ ގައުމީ ޓީމަށް ލަނޑު ޖަހައިދިން އެންމެ ދުވަސްވީ ކުޅުންތެރިޔާއަށެވެ. މީގެ ކުރިން ޔޫރޯ 2024 ގައި އިޓަލީ ކޮޅަށް ލަނޑު ޖެހުމުން، އޭނާ ވެފައިވަނީ އެ މުބާރާތުގެ ތާރީޚުގައި ލަނޑު ޖެހި އެންމެ ދުވަސްވީ ކުޅުންތެރިޔާއަށެވެ.

Ad by Hajj Corporation

ނަމަވެސް، ކްރޮއޭޝިއާއިން ލީޑު ނެގިތާ ހަތް މިނެޓު ފަހުން ޗެކިއާގެ އާދަމް ކަރަބެކް ވަނީ ލަނޑެއް ޖަހައި މެޗުގެ ނަތީޖާ 1-1 އަށް ބަދަލުކޮށްފައެވެ.

މެޗު އެއްވަރުވެފައި އޮތުމަށްފަހު، ކްރޮއޭޝިއާއިން އަލުން ލީޑު ނެގީ މެޗުގެ ފަހުކޮޅުގައެވެ. އިވާން ޕެރިސިޗް ތަނަވަސްކޮށްދިން ފުރުސަތަކުން މާކޯ ޕަޝަލިޗް ވަނީ އެ ޓީމުގެ ދެވަނަ ލަނޑު ކާމިޔާބުކޮށްދީ މޮޅު ކަށަވަރުކޮށްދީފައެވެ. މި ލަނޑު ޖެހުމުގެ ކުޑައިރުކޮޅެއް ކުރިން މޮޑްރިޗް ބަދަލުކުރެވުނުއިރު، ދަނޑުގައި ތިބި ސަޕޯޓަރުން ވަނީ އޭނާއަށް ހޫނު ތަރުހީބެއް ދީފައެވެ. މެޗުގެ ކުރިން އޭނާގެ ފިޓްނަސްއާ މެދު ސުވާލު އުފެދިފައި އޮތް ނަމަވެސް އޭނާ ވަނީ މޮޅު ކުޅުމެއް ދައްކާފައެވެ.

2026 ވަނަ އަހަރުގެ ފީފާ ވޯލްޑް ކަޕަށްފަހު މޮޑްރިޗްގެ ބައިނަލްއަގުވާމީ ކެރިއަރާ މެދު ސުވާލު އުފެދުނު ނަމަވެސް، އޭނާ ވަނީ އާ ކޯޗު ސްލަވެން ބިލިޗް އަދި ކްރޮއޭޝިއާ ފުޓްބޯޅަ ފެޑެރޭޝަނަށް ގައުމީ ޓީމަށް ކުޅެން ތައްޔާރަށް ހުރިކަން އަންގާފައެވެ. މި މެޗުގެ ކުރިން އޭނާ ވަނީ ގައުމީ ޓީމަށް 202 މެޗު ކުޅެދީ، އެންމެ ގިނަ މެޗު ކުޅެދިން ކުޅުންތެރިޔާގެ ރެކޯޑް ދަމަހައްޓާފައެވެ.

ސެޕްޓެމްބަރު 9 ގައި 41 ވަނަ އަހަރީ ދުވަސް ފާހަގަކުރި މޮޑްރިޗް، އިޓަލީގެ މިލާނަށް 40 މެޗު ކުޅެދީ ދެ ލަނޑާއި ތިން އެސިސްޓް ހަދާފައިވާއިރު، ޖުލައި މަހު އޭނާ ވަނީ އެ ކްލަބާއެކު ހަދާފައިވާ އެއްބަސްވުން 2027 ގެ ޖޫން މަހުގެ ނިޔަލަށް އާކޮށްފައެވެ.