ރިއަލް މެޑްރިޑްގެ ލެޖެންޑަރީ މިޑްފީލްޑަރު ލޫކާ މޮޑްރިޗްއަށް ބާސެލޯނާގެ ރަސްމީ ޗެނަލުން އިހުތިރާމް ކުޑަކޮށްފައިވާތީ ގިނަ ބަޔަކު ފާޑުކިޔަން ފަށައިފިއެވެ. މިކަން ދިމާވެފައިވަނީ ބާސެލޯނާއިން އެފްސީ ސިއޯލްއާ ދެކޮޅަށް ކުޅުނު މެޗެއްގެ ލައިވް ކޮމެންޓްރީގައި މޮޑްރިޗްއާ ދެކޮޅަށް ފާޑުކިޔުމުގެ ގޮތުން ދެއްކި ވާހަކަތަކާ ގުޅިގެންނެވެ.

ސްޕެނިޝް ނޫސްވެރިއެއް ކަމަށްވާ އަލްބަޓް އޯޓެގާ ހިއްސާކުރި މައުލޫމާތުގައިވާ ގޮތުން، ބާސެލޯނާގެ ރަސްމީ ޗެނަލުގެ ކޮމެންޓޭޓަރު ބުނެފައިވަނީ މޮޑްރިޗްއަށް އެއްވެސް އިހުތިރާމެއް ނުކުރާނެ ކަމަށެވެ. އަދި މޮޑްރިޗްގެ އެންމެ ފަހުގެ ބޮޑު ހިދުމަތަކީ ކޯޕާ ޑެލް ރޭގެ ފައިނަލްގައި ކުންޑޭއަށް ދިން ބޯޅައެއް ކަމަށް ބުނެފައިވެއެވެ.

މި ކޮމެންޓްރީގައި އިޝާރާތްކޮށްފައިވަނީ މިދިޔަ އޭޕްރީލް 26 ވަނަ ދުވަހު ކުޅުނު ކޯޕާ ޑެލް ރޭގެ ފައިނަލްގައި މޮޑްރިޗްގެ ކިބައިން ދިމާވި ކުށަކަށެވެ. އެ ކުށުގެ ސަބަބުން ޖުލްސް ކުންޑޭއަށް ލިބުނު ބޯޅައިން ބާސެލޯނާއަށް އެކްސްޓްރާ ޓައިމްގައި 3-2 އިން މެޗު ކާމިޔާބުކުރެވުނެވެ.

މި މައްސަލައިގައި ރިއަލް މެޑްރިޑްގެ ގިނަ ސަޕޯޓަރުން ވަނީ ބާސެލޯނާއަށް ފާޑުކިޔާފައެވެ. އެގޮތުން ގިނަބަކަު ބުނަނީ ބާސެލޯނާގެ ތާރީޚުގެ 126 އަހަރު ތެރޭގައި 5 ޗެންޕިއަންސް ލީގު ކާމިޔާބުކޮށްފައިވާއިރު، މޮޑްރިޗްގެ ކެރިއަރުގައި އެކަނިވެސް 6 ޗެންޕިއަންސް ލީގު ކާމިޔާބުކޮށްފައިވާކަމަށެވެ. އެހެންކަމުން އެވަރުގެ ލެޖެންޑަރީ ކުޅުންތެރިޔަކަށް އިހުތިރާމް ކުޑަކުރުމަކީ ވަރަށް ދަށު ދަރަޖައިގެ ކަމެއްކަމުގައި ސިފަކޮށްފައިވެއެވެ. އަދި ބައެއް ސަޕޯޓަރުން ވަނީ ބާސެލޯނާގެ ތާރީހުގެ އެންމެ މޮޅު މިޑްފީލްޑަރ އިނިއެސްޓާ އަށް ރެއާލް މެޑްރިޑުން ދިން ފެއާވެލް ހަނދާން އާކޮށްފައެވެ. އިނިއެސްޓާއަށް ރެއާލް މެޑްރިޑުން ވަނީ އެލް ކްލެސިކޯގައި ޓްރިބިއުޓެއް ދީ ކުލަބްގެ އޮފިޝިއަލް ވެބްސައިޓްގައި އެކަން ފާހަގަކޮށްފައެވެ.

މިކަމާ ގުޅިގެން ސޯޝަލް މީޑިއާގައި ގިނަ ބަޔަކު ވަނީ ބާސެލޯނާއިން މާފަށް އެދުމަށް ގޮވާލާފައެވެ. އަދި މޮޑްރިޗްއަކީ ބާސެލޯނާއަށް އެއްވެސް އިރެއްގައި އިހުތިރާމް ކުޑަކޮށްފައިވާ ކުޅުންތެރިއެއް ނޫންކަން ފާހަގަކޮށްފައިވެއެވެ.

ބައެއް ފަރާތްތަކުން ބާސެލޯނާއަށް "ކޮރަޕްޓް" ކްލަބެއްގެ ގޮތުގައި ލަގަބުދީ، އެ ކްލަބުގެ ކުރީގެ ކްލާސް ގެއްލިފައިވާ ކަމަށް ބުނެފައިވެއެވެ. އަދި މި މައްސަލައަކީ ހަމައެކަނި ކުޅިވަރުގެ އިމުގެ ތެރޭގައި އޮތް ކަމެއް ނޫން ކަމަށާއި، ސްޕެއިންގެ ދެ ބޮޑު ކްލަބުގެ ދެމެދުގައި އޮންނަ ވާދަވެރިކަމަށް އޭގެ ނޭދެވޭ އަސަރު ކުރާނެ ކަމެއް ކަމަށް ފާހަގަކޮށްފައިވެއެވެ.