ނިއުކާސްލް ޔުނައިޓެޑްގެ ސްޓްރައިކަރު އަލެކްސަންޑަރ އިސާކް ސޮއިކުރުމަށް ލިވަޕޫލުން މަސައްކަތް ފަށައިފިއެވެ. އެތްލެޓިކްގެ ރިޕޯޓެއްގައި ބުނެފައިވާ ގޮތުގައި ލިވަޕޫލުން ވަނީ 120 މިލިއަން ޕައުންޑުގެ އަގެއްގައި އިސާކް ގަތުމަށް ޝައުގުވެރިކަން ފާޅުކޮށް ނިއުކާސަލް އާއި ވާހަކަ ދައްކަން ފަށާފައިވާކަމަށް މިރިޕޯޓްގައި ބުނެފައިވެއެވެ.

ނަމަވެސް މިހާތަނަށް ރަސްމީ އޮފަރެއް ހުށަހަޅާފައި ނުވާކަމަށާއި، ނިއުކާސްލްއިން އެ ކުޅުންތެރިޔާ ވިއްކާލަން ބޭނުން ނުވާކަން ލިވަޕޫލަށް އެނގޭކަމަށް އެތްލެޓިކްގެ ރިޕޯޓުގައި ބުނެއެވެ. 25 އަހަރުގެ ސުވިޑަނުގެ ސްޓްރައިކަރަށް ލިވަޕޫލުން ވަނީ ކުރީއްސުރެ ޝައުގުވެރިކަން ފާޅުކުރަމުން އައިސްފައެވެ.

ފާއިތުވި މޫސުމުގައި ޕްރިމިއަރ ލީގުގައި އިސާކް ވަނީ 23 ލަނޑު ޖަހާފައެވެ. މިއީ ލިވަޕޫލްގެ މުހަންމަދު ސަލާހުގެ ފަހަތުން އެންމެ ގިނަ ލަނޑު ޖެހި ކުޅުންތެރިޔާއެވެ.

2022 ވަނަ އަހަރު ރިއަލް ސޮސިއެޑާޑުން 60 މިލިއަން ޕައުންޑަށް ނިއުކާސްލްއާ ގުޅުނު އިސާކް ވަނީ އެ ޓީމަށް ކުޅުނު 109 މެޗުގައި 62 ލަނޑު ޖަހާފައެވެ. އޭނާގެ ލަނޑުތަކާއެކު ނިއުކާސްލްއިން ވަނީ މިދިޔަ މާޗް މަހު ކަރަބާއޯ ކަޕް ކާމިޔާބުކޮށްފައެވެ. މިއީ 70 އަހަރު ފަހުން ނިއުކާސްލްއިން ކާމިޔާބުކުރި ފުރަތަމަ މޭޖަރ މުބާރާތެވެ.