މެލޭޝިއާއިން ރާއްޖެއަށް ޑްރަގް ގެނެސް، އެތަކެތީގެ ޕެކިން ބަދަލުކޮށް، އެތަކެތި އިނގިރޭސިވިލާތަށް ބޭރުކުރަން އުޅުނު މައްސަަލައެއް ފެންމަތިވެއްޖެއެވެ.

މިދިޔަ ޖުލައި މަހުގެ 27 ވަނަ ދުވަހު، ރާއްޖެއަށް އައި ފްލައިޓަކުން އައި މެލޭޝިއާގެ މީހެއްގެ ލަގެޖުން ޑްރަގް ފެނިގެން، އެފަދަ ކަމެއް ހިނގިކަން ހާމަކުރީ މިއަދު ފުލުހުން މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

އެގޮތުން އެ މައްސަލައިގެ މައުލޫމާތު ދެއްވަމުން ޑްރަގް އެންފޯސްމަންޓް ޔުނިޓުގެ ފަރާތުން ސުޕްރިންޓެންޑެންޓް ނާހިދު ހުސައިން ވިދާޅުވީ، އެމިރޭޓްސްގެ ފްލައިޓަކުން ރާއްޖެއަށް އައި މެލޭޝިއާގެ މީހެއް ކަމުގައިވާ، 44 އަހަރުގެ ޖީ ތަމް ލިޕްގެ ލަގެޖުން ޝައްކުކުރެވޭ ކަންތައްތަކެއް ފާހަގަވެގެން، ރާއްޖޭގެ ކަސްޓަމްސް އިން އެ މީހާގެ ބެލި ކަމަށެވެ. އަދި އެކަމުގެ ތެރެއިން، ލަގެޖުން މަސްތުވާތަކެތި ކަމަށް ޝައްކުކުރެވޭ އެއްޗެއް ފެނުނު ކަމުގައި ވެސް ނާހިދު ވިދާޅުވިއެވެ.

ނާހިދު ވިދާޅުވި ގޮތުގައި، އެ މައްސަލައާ ގުޅިގެން ކޮންޓްރޯލްޑް ޑެލިވަރީ އޮޕަރޭޝަނެއް ފުލުހުން ކުރިއަށް ގެންދިޔަ ކަމަށާއި އެ އޮޕަރޭޝަނުން ފާހަގަ ކުރެއްވުނީ ވީޗެޓް ގުރޫޕެއް މެދުވެރިކޮށް މުވާސަލާތު ކުރަމުން ގެންދިޔަ ކަމަށެވެ. އަދި އެކަމުގެ ތެރެއިން އިތުރު މީހަކު ވެސް ޑްރަގުތައް ބަލައި އެއާޕޯޓަށް އަންނާނެ ކަން ފުލުހުންނަށް ފާހަގަ ކުރެވުނު ކަމަށެވެ. ނާހިދު ބުނި ގޮތުގައި، ޑްރަގް ބަލައި އައީ 41 އަހަރުގެ ކޯ ޚުއާން ބޫން އެވެ.

އެ މައްސަލައިގައި އެމީހުން ގެނައި ޑްރަގުގައި 13.5 ކިލޯގެ ކެނަބިސް ހުރިއެވެ.

އިތުރަށް ނާހިދު ވިދާޅުވީ، އެ މައްސަލައިގައި ގެނައި ޑްރަގަކީ، އޭގެ ޕެކިން ބަދަލުކޮށް އިނގިރޭސިވިލާތަށް ބޭރުކުރަން ގެނައި ތަކެތިކަން ފުލުހުންގެ ތަހުގީގަށް އެނގިފައިވާ ކަމަށެވެ. އަދި އެ މައްސަލައިގައި ހައްޔަރުކުރި ދެ މީހުންނަކީ، އެކި ގައުމުތަކަށް ޑުރަގު ފޯރުކޮށްދިނުމުގައި އިސްކޮށް އުޅޭ ދެ މީހަކު ކަމުގައި ވެސް ނާހިދު ވިދާޅުވިއެވެ.