މުޅި ދުނިޔެއަށް ނަޒަރެއް: 122 މިިލިއަން މީހުންގެ ގެދޮރު ގެއްލިއްޖެ
12 ޖޫން 2025 - 15:10

ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި ހަމަނުޖެހުންތަކާ ގުޅިގެން އަމިއްލަ ވަޒަން ދޫކޮށް އެހެން ސަރަޙައްދުތަކަށް ބަދަލުވުމަށް މަޖުބޫރުވެ، ގެދޮރު ނެތިފައިވާ މީހުންގެ އަދަދު 122 މިިލިޔަނަށް އުފުލިފައިވާ ކަން އެކުވެރި ދައުލަތްތައް (އދ)ން ހާމަކޮށްފިއެވެ.
މި ކަން ހާމަ ކޮށްފައި ވަނީ ރެފިއުޖީންނާ ބެހޭ އދގެ ހައި ކޮނިޝަނަރު ފިލީޕޯ ގްރާންދީ ނެރުއްވި ރިޕޯޓެއްގައެވެ.

Ad by Hajj Corporation
އެގޮތުން، ސޫދާންގެ އަހުލީހަނގުރާމައާއި ރަޝިޔާ-ޔޫކްރެއިން ހަނގުރާމައާ ގުޅިގެން ގެދޮރު ގެއްލިފައިވާ އެތަކެއް މިލިޔަން މީހުންނެއްގެ ހާލަތު އެ ރިޕޯޓުގައި ފާހަގަ ކޮށްފައިވެއެވެ.
މީގެ އިތުރުން މިޔަންމާގެ އަސްކަރީ ސަރުކާރުން އެ ޤައުމުގެ ރޮހިންޔާ ދަރިކޮޅުގެ މުސްލިމުންނާ ދެކޮޅަށް ހިންގަމުންދާ ޤަތުލުޢާންމާ ގުޅިގެން ގިނަ އަދަދެއްގެ ބަޔަކު ގެދޮރު ނެތި، ރެފިއުޖީންނަށް ވެފައިވާ ކަން ވެސް ރިޕޯޓުގައި ފާހަގަ ކޮށްފައިވެއެވެ. އަދި، އެ ހަމަނުޖެހުންތައް ހުއްޓުވަން ބައިނަލްއަޤްވާމީ މުޖުތަމަޢު ފޭލުވެފައިވާ ކަމުގައި ޔޫއެންއެޗްސީއާރްގެ ރިޕޯޓުގައި ބުނެފައިވެއެވެ.
ދުނިޔޭގެ އެކި ކަންކޮޅުތަކުގައި ހަނގުރާމަތަކުގެ ސަބަބުން ގެދޮރު ނެތިފައިވާ މީހުންގެ އަދަދު 122 މިލިޔަނަށް އުފުލިފައިވާއިރު، އެ މީހުންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދިނުމަށް ކުރަމުންދާ މަސައްކަތްތައް ވެސް ވަނީ މަޑުޖެހިފައެވެ.
އަދި، 2015ވަނަ އަހަރަށް ފަހު، އެހީދޭ ޤައުމުތަކާއި އިދާރާތަކުން ރެފިއުޖީންނަށް ފޯރުކޮށްދޭ އެހީގެ މިންވަރު އެތަކެއް ގުނައަކުން ވަނީ ދަށްވެފައެވެ.