ސޫރިޔާގެ ވެރިރަށް ދިމިޝްޤުގެ ހުޅަނގު ދެކުނުގައި އޮތް އަސްކަރީ ވައިގެ ބަނދަރަކަށް ޔަހޫދީ ސިފައިން އަރައި އޮޕަރޭޝަނެއް ހިންގައިފިއެވެ. 

މަސްރަޙު ދިރާސާ ކުރާ ފަރާތްތަކުން ބުނީ، ޔަހޫދީ ސިފައިން އެ ވައިގެ ބަނދަރަށް އަރާފައި ވަނީ، މަތިންދާބޯޓެއްގައި ދަތުރު ކުރުމަށް ފަހު ވައިކުޑައިގެ އެހީގައި ބިމަށް ތިރިކޮށްގެން ކަމަށް ބެލެވޭ ކަމުގައެވެ. އެ ވައިގެ ބަނދަރުގައި އޮޕަރޭޝަނެއް ހިންގުމަށް ފަހު، ޔަހޫދީ ސިފައިން ވަނީ އެ ތަން ދޫކޮށް ގޮސްފައެވެ.

Ad by Hajj Corporation

މި އޮޕަރޭޝަން ހިންގި ބަނދަރަކީ، ސޫރިޔާގެ ކުރީގެ ރައީސް ބައްޝާރް އަލް-އަސަދުގެ ވެރިކަމުގެ ދުވަސްވަރު އީރާނުން ބޭނުން ކޮށްފައިވާ ވައިގެ ބަނދަރެއް ކަމުގައި މަޞްދަރުތަކުން ބުނެއެވެ. ޔަހޫދީ ސިފައިން އެ ވައިގެ ބަނދަރަށް އަރާފައި ވަނީ ވައިގެ މަގުންނެވެ. ނަމަވެސް، އެރި ގޮތުގެ ތަފުސީލެއް ސާފެއް ނޫނެވެ.

ސޫރިޔާގެ ދެކުނުގެ ބައެއް ސަރަޙައްދުތަކުގައި ޔަހޫދީ ސިފައިން މިހާރު ވެސް ދަނީ ހަރަކާތްތެރިވަމުންނެވެ. އެ މީހުން ސޫރިޔާއަށް އަރައިގަނެފައި ވަނީ ނިރުބަވެރި ޖަމާޢަތް، ހަޔިއަތު ތަޙްރީރް އަލް-ޝާމް (އެޗްޓީއެސު)ން ބަޣާވާތެއް ކޮށް، އަސަދުގެ ވެރިކަން ވައްޓައިލުމާ އެކުގައެވެ. އެއީ، 2024ވަނަ އަހަރުގެ ޑިސެންބަރު މަހުގެ 8ވަނަ ދުވަހުއެވެ. ސޫރިޔާގެ ދެކުނުގެ ސަރަޙައްދުގައި ޔަހޫދީ ސިފައިން ހިންގަމުންދާ އަސްކަރީ އޮޕަރޭޝަންތައް ވެސް ފަހަކަށް އައިސް ވަނީ އިތުރު ކޮށްފައެވެ.

ޔަހޫދީންގެ އޮޕަރޭޝަނުގައި ބައެއް މީހުންގެ ފުރާނައަށް ނުރައްކާވި ކަމުގައި ރިޕޯޓުތައް ބުނި ނަމަވެސް، އެ ކަން ކަށަވަރު ކުރެވިފައެއް ނުވެއެވެ. ޔަހޫދީންގެ އޮޕަރޭޝަން ހިންގި ވަގުތު، ސޫރިޔާގައި ވެރިކަން ކުރާ އެޓްޗީއެސް ސަރުކާރުގެ ރައީސް އަޙްމަދު އަލް-ޝަރާޢު ހުރީ، އެ ވައިގެ ބަނދަރާ 15 ވަރަކަށް ކިލޯމީޓަރު ދުރުގައި އޮތް ސަރަޙައްދެއްގައެވެ.