ނިރުބަވެރި ޔަހޫދީ ދައުލަތް އިޒްރޭލުން، އީރާނަށް ދިން ޙަމަލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަރުކަށި އިބާރާތުން ކުށްވެރިކުރައްވައިފިއެވެ.

އެކްސްގައި މިއަދު ކުރެއްވި ޕޯސްޓެއްގައި ރައީސް ވިދާޅުވީ، އެފަދަ އަމަލުތަކަކީ ބައިނަލްއަގްވާމީ ގާނޫނުތަކާ ވަރަށް ބޮޑަށް ހިލާފު އަދި ސަރަހައްދީ ސުލްހަ މަސަލަސްކަމަށް ނުރައްކާވާ ކަމެއް ކަމަށެވެ.

Ad by Hajj Corporation

އަދި މި ހަމަލާތައް އިތުރުވުމުގެ ކުރިން ހުއްޓުވުމަށް އަވަސް ފިޔަވަޅުތަކެއް އަޅަން ޖެހޭ ކަމަށް ރައީސް ވިދާޅުވިއެވެ.

އެ ޕޯސްޓުގައި ރައީސް ވަނީ މި ޙަމަލާތަކުގެ ސަބަބުން އީރާނުގެ އިތުރުން އަވަށްޓެރި ޤައުމުތަކަށާއި، މުޅި ދުނިޔެއަށްވެސް ނުރައްކާތެރި އަސަރުތަކެއް ކުރާނެކަމުގައި ވެސް ފާހަގަކުރައްވާފައެވެ.

އިޒްރޭލުން އިރާނުގެ ނިއުކްލިއާ ހަތިޔާރުތައް އުފައްދާ ތަންތަނަށާއި އާންމު ބައެއް ތަންތަނަށް ޙަމަލާދީފައިވަނީ މިއަދުގެ ހެނދުނުގެ ވަގުތެއްގައެވެ. އެ ޙަމަލާގެ ބަދަލެއްގެ ގޮތުން އިޒްރޭލަށް އަމާޒުކޮށް އީރާނުން ވެސް މިއަދުގެ މެންދުރުގެ ވަގުތެއްގައި ވަނީ ވަރުގަދަ ޙަމަލާތަކެއް ދީފައެވެ.

އިޒްރޭލުގެ މި ހަމަލާގައި އީރާނުގެ ގިނަ އަދަދެއްގެ ކޮމާންޑަރުންނާއި ސައިންޓިސްޓުން ޝަހީދުވެފައިވާ ކަމަށް އެ ގައުމުގެ ސުޕްރީމް ލީޑަރު އާޔަތުއްﷲ އަލީ ހަމެނީ ފާހަގަކުރެއްވިއެވެ.