ހައްދުންމަތީގައި ތަރައްޤީކުރުމަށް ހަމަޖެހިފައިވާ ދެވަނަ އެއާޕޯޓު އެ އަތޮޅު އިސްދޫ ކަލައިދޫގައި އެޅުމަށް ސަރުކާރުން ނިންމަވައިފިއެވެ. މިކަން އިޢުލާނު ކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު 2025 ވަނަ އަހަރުގެ އޮކްޓޫބަރު މަހު ލ. މާވަށަށް ކުރެއްވި ރަސްމީ ދަތުރުފުޅުގައި އެ ރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ބިން ނުހިއްކާ އެއާޕޯޓު އެޅޭނެ ފުރުސަތު

Ad by Hajj Corporation

ރައީސުލްޖުމްހޫރިއްޔާ ވިދާޅުވީ ލ. އަތޮޅުގެ ދަތުރުފުޅުގައި އެންމެ ގިނަ ރައްޔިތުން އެދެމުންދިޔައީ އެއާޕޯޓެއްގެ ވާހަކަ ކަމަށެވެ. އެގޮތުން ތިން ރަށަކުން މިކަމަށް އެދެމުންދިޔަ ނަމަވެސް، އިސްދޫ ކަލައިދޫ އިޚްތިޔާރު ކުރެއްވީ ދެމެހެއްޓެނިވި ތަރައްޤީއަށް އިސްކަންދިނުމުގެ ގޮތުންނެވެ.

"މިރަށުގައި ތަފާތު ކަމަކީ އެއަރޕޯޓެއް އަޅާއިރު، ބިން ހިއްކަން ޚަރަދު ކުރަން ނުޖެހޭ، ބިން ނުހިއްކާ އެކަން ކުރެވޭނެ. އެއީ ފާހަގަކޮށްލަންޖެހޭ ވަރަށް މުޙިއްމު ނުކުތާއެއް" ރައީސް ވިދާޅުވިއެވެ. މި ނިންމުމުގެ ސަބަބުން މަޝްރޫޢަށް ހިނގާ ޚަރަދު ކުޑަވެ، އަވަސް މުއްދަތެއްގައި މަސައްކަތް ނިންމާލެވޭނެ ކަމަށް ބެލެވެއެވެ.

ދަތުރުފަތުރަށް އިންގިލާބީ ބަދަލެއް

މި މަޝްރޫޢުގެ ސަބަބުން މުޅި އަތޮޅުގެ ރައްޔިތުންނަށް، ވަކިން ޚާއްޞަކޮށް އިސްދޫ، ކަލައިދޫ، ދަނބިދޫ އަދި މާބައިދޫގެ ރައްޔިތުންނަށް ދަތުރުފަތުރުގައި ބޮޑު ލުޔެއް ލިބޭނެއެވެ. ގެދޮރުވެރިކަމާއި ބެހޭ ވުޒާރާއިން ފާހަގަކުރެއްވި ގޮތުގައި، މިހާރު އެ ސަރަހައްދުގެ ރައްޔިތުން ކައްދޫ އެއާޕޯޓަށް ދިއުމަށް ކުރަންޖެހޭ 45 މިނެޓުގެ ދިގު ދަތުރު މި އެއާޕޯޓާއެކު ނިމުމަކަށް އަންނާނެއެވެ.

އިޤްތިޞާދީ އަދި އިޖުތިމާޢީ ކުރިއެރުން

އިސްދޫ ކަލައިދޫއަކީ ބިމުގެ ގޮތުން ތަނަވަސް، އާބާދީއާއި ތަރައްޤީ އެއްފަސްކުރުމުގެ ފުރުސަތު އޮތް ރަށެކެވެ. ލ. އަތޮޅުގައި މިހާރު އޮޕަރޭޓް ކުރަނީ ކައްދޫ އެއާޕޯޓު އެކަނި ކަމަށްވާއިރު، އާ އެއާޕޯޓާއެކު އެ އަތޮޅުގެ ތާރީޚީ އަދި ގުދުރަތީ ރީތިކަން ބޭނުންކޮށްގެން އިޤްތިޞާދީ އިތުރު ފުރުސަތުތައް ފަހިވެގެންދާނެއެވެ.