މަކުނުދޫ އެއާޕޯޓަށް ވަރަށް އިސްކަންދެން، ބޭނުންވަނީ ވަރަށް އަވަހަށް އެ މަޝްރޫއު ނިންމަން: ރައީސް
.jpg&w=96&q=75)
26 އޯގަސްޓު 2025 - 05:50
ހދ. މަކުނުދޫގައި ޤާއިމްކުރުމަށް ސަރުކާރުން ނިންމާފައިވާ އެއާޕޯޓުގެ މަޝްރޫއަށް ސަރުކާރުން ވަރަށް އިސްކަންދޭ ކަމަށާއި، ބޭނުންފުޅުވަނީ ވީހާ ވެސް އަވަހަށް އެ މަޝްރޫއު ނިންމުމަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްެޖެއެވެ.
ހދ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން އެ އަތޮޅު މަކުނުދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ، މަކުނުދޫގެ ތަރައްގީއަށް ބޭނުންވާ ކަންކަމުގެ ތެރެއިން އެންމެ މުހިންމު ކަމަކީ އެއާޕޯޓުގެ މަސައްކަތް ނިންމުން ކަމަށާއި، ރިޔާސީ އިންތިހާބުގައި ވެސް އަދި އޭގެ ފަހުން އެމަނިކުފާނު ވެވަޑައިގެންނެވި އެންމެ މުހިންމު ވައުދުފުޅަކީ ވެސް އެ ރަށުގެ އެއާޕޯޓުގެ މަސައްކަތް ކުރިއަށް ގެންދިއުން ކަމަށެވެ.

Ad by Hajj Corporation
މި ރަށަކީ ރާއްޖޭގައި އަތޮޅުތައް ބެހިފައި، ރަށްރަށް ބެހިފައި އޮންނަ ގޮތަށް ބަލާއިރު، ވަރަށް އެކަހެރިކޮށް ހުޅަނގަށް އެންމެ ވަކިން އޮންނަ ރަށް. ދަތުރުފަތުރުކުރުމުގައި އެންމެ އުނދަގޫ އެއް ހިސާބު. އެހެންވީމާ ދުރު ރާސްތާއަށް، ދެމެހެއްޓެނިވި ތަރައްގީގެ ސިޔާސަތުން ބަލާއިރުގައި މި ރަށުގައި އެއާޕޯޓެއް ޤާއިމްކުރުމަކީ ޒަރޫރީ ކަމެއް. ކޮންމެހެން ކުރަން ޖެހޭ ކަމެއް ގޮތުގައި އަޅުގަނޑުމެން ޤަބޫލުކުރަނީ، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ މަކުނުދޫގެ އެއާޕޯޓާއެކު ދަތުރުފަތުރަށް ލިބޭނެ ތަރައްގީގެ ސަބަބުން، އެ ރަށުގެ އިގްތިސާދީ ތަރައްގީ، މަތީ ހަރުފަތަކަށް ގެންދެވޭނެ ކަމަށެވެ. އަދި އެކަންކުރުމުގައި އެ އެއާޕޯޓު ވާނީ ވަރަށް މުހިންމު ދޮރާށްޓަކަށް ކަމަަށް ރައީސް ވިދާޅުވިއެވެ.
މަކުނުދޫ އެއާޕޯޓުގެ ބިން ހިއްކުމުގެ މަޝްރޫއުގެ ބާކީ ބައި ހިއްކުމަށް އެމްޓީސީސީއާ މިއަދު ހަވާލުކޮށްފައިވާއިރު، އެކަމަށް އިޝާރަތްކުރައްވަމުން ރައީސް ވިދާޅުވީ، އެ ރަށުގެ އެއާޕޯޓުގެ ބިން ހިއްކައި ނިމޭއިރު 1،800 މީޓަރުގެ ދިގު ރަންވޭއެއް ޤާއިމްކުރެވޭނެ ކަމަށާއި އޭގެ އިތުރަށް ރަށުގެ ބޭނުންތަކަށް 22 ހެކްޓަރުގެ ބިން އޭގެން ލިބޭނެ ކަމަށެވެ.
ގެދޮރު އެޅުމާއި އެހެނިހެން ބޭނުންތަކަށް، ރަށަށް ބޭނުންވާނެ ބިން އިތުރުކުރުމާއެކީގައި އަދި އެއާޕޯޓުގެ ހުރިހާ އިންފްރާސްޓްރަކްޗާއެއް ޤާއިމްކޮށް ނިމުމާއެކީގައި ކުރިޔަށްދާނީ. އެހެންވީމާ މިއަދު ސޮއިކުރެވުނު މަޝްރޫއު ނިމިގެންދާއިރު މި ދެންނެވި ހުރިހާ ކަމެއް ފުރިހަމަވެފައި އޮންނާނެ ކަމުގެ ޔަގީންކަން އަޅުގަނޑު، މި ރަށުގެ ހުރިހާ ލޮބުވެތި ރައްޔިތުންނަށް ދެން، - ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ މަކުނުދޫ އެއާޕޯޓުގެ ބިން ހިއްކައި އިންފްރާސްޓްރަކްޗާ ޤާއިމްކޮށް ނިމުމުން އެ އެއާޕޯޓާ ހަވާލުވާނީ އެމްއޭސީއެލް އިން ކަމަށާއި، އެ މަސައްކަތްކުރުމަށް އެމްއޭސީއެލް އިން ސަރުކާރާ ގުޅިގެން މިހާރުން ފެށިގެން މަސައްކަތްތައް ކުރަން ފަށާނެ ކަމަށެވެ.
އަދި އެ އެއާޕޯޓަކީ ސަރުކާރުން ވަރަށް އިސްކަމެއް ދީގެން ކުރިޔަށްގެންދާނެ މަޝްރޫއެއް ކަމަށާއި، ސަރުކާރުން ބޭނުންވަނީ އެ މަޝްރޫއު ވިހާ ވެސް އަވަހަކަށް ނިންމުމަށް ކަމަށް ރައީސް ވިދާޅުވިއެވެ. އަދި އެ މަޝްރޫއުގެ މަސައްކަތްތައް ބާރު ސްޕީޑުގައި ކުރިޔަށްގެންގޮސް ނިންމާލެވޭނެ ކަމުގެ ޔަގީންކަން އެމަނިކުފާނު ވަނީ އެ ރަށުގެ ރައްޔިތުންނަށް ދެއްވާފައެވެ.