ޣައްޒާ ހަނގުރާމަ ފެށިފަހުން މިހާތަނަށް ހަމާސްއިން ޔަހުދީ ސިފައިންގެ 430 މީހުން މަރާލާފައިވާކަމަށް ޔަހޫދީ ނޫސްތަކުން ރިޕޯޓުކޮށްފިއެވެ.

ޔަހޫދީ ނޫސްތަކުން ރިޕޯޓުކުރާގޮތުގައި މި 430 މީހުންގެ ތެރޭގައި 2 ފުލުހުންނާއި ޔަހޫދީ ދިފާއީ ވުޒާރާގެ 3 މަދަނީ މުވައްޒަފުން ހިމެނޭގޮތަށް ޔަހޫދީ އަސްކަރިއްޔާގެ އިސް މީހުން ހިމެނެއެވެ.

އެންމެ ފަހުން ހަމާސްއިން މަރާލާފައިވަނީ ޔަހޫދީ ސިފައިންގެ ސްކޮޑް ކޮމާންޑަރެކެވެ.

އިސްރާއީލު ސިފައިން ބުނީ އޭނާ މަރުވީ ޣައްޒާގެ ދެކުނުގައި އޮންނަ ޚާން ޔޫނިސް އަވަށުގައި ހިނގި ކުރިމަތިލުންތަކެއްގައި ހަމާސްއިން އާރްޕީޖީއަކުން ދިން ހަމަލާއެއްގައެވެ. މި ހަމަލާގައި އިތުރު ބަޔަކަށް ސީރިއަސް އަނިޔާތަކެއް ލިބިފައިވާކަމަށްވެސް ޔަހޫދީން ވަނީ ބުނެފައެވެ.

ޔަހޫދީން ހުއްޓުމެއްނެތި ދެމުންދާ ހަމަލާތަކަށް ކެތް ނުކުރެވިގެން 2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތުން ޔަހޫދީންނަށް އަމާޒު ކޮށް ދިން ޖިހާދީ ހަމަލާއަކާ ގުޅިގެން ޔަހޫދީން އަންނަނީ ޣައްޒާގެ މުސްލިމުންގެ ނަސްލު ނައްތާލުމަށް ހަމަލާތަކެއް ދެމުންނެވެ.

ޖަނަވަރީމަހު އުދުވާން ހުއްޓާލިނަމަވެސް އަނެއްކާވެސް މާރިޗު މަހު އަލުން ހަނގުރާމަ ފަށައި ޣައްޒާގެ ފުރަބަންދު ހަރުކަށިކޮށް، އެ ސަހަރަށް ކާބޯތަކެއްޗާއި އެހީގެ ސާމާނު ވެއްދުމަށް ހުރަސް އަޅައި ޔަހޫދީން ގެންދަނީ ލާއިންސާނީ އެތައް ޖަރީމާތަކެއް ހިންގަމުންނެވެ.