ސިންސިނާޓީގައި ކުޅުނު ފީފާ ކްލަބް ވޯލްޑް ކަޕްގެ ގްރޫޕް ސީގެ ފުރަތަމަ މެޗުގައި ޖަރުމަނުގެ ޗެމްޕިއަން ބަޔާން މިއުނިކް، ނިއުޒިލޭންޑްގެ އޮކްލޭންޑް ސިޓީ އެފްސީ އަތުން 10-0 ގެ ބޮޑު ނަތީޖާއަކުން މޮޅުވެއްޖެއެވެ.

2022 އަދި 2023 ވަނަ އަހަރުގެ އޯސީނިއާ ޗެންޕިއަންސް އޮކްލޭންޑް ސިޓީގެ ގިނަ ކުޅުންތެރިންނަކީ ޕާރޓްޓައިމް ފުޓްބޯޅަކުޅުންތެރިްނެވެ.

Ad by Hajj Corporation

މެޗުގެ ފަސްވަނަ މިނެޓްގައި ކިންގްސްލީ ކޯމަންގެ ވަރުގަދަ ޝޮޓެއް އޮކްލޭންޑްގެ ގޯލްކީޕަރު ކޮނަރ ޓްރޭސީ ހުއްޓުވި ނަމަވެސް، އޭގެ ފަހުން ލިބުނު ކޯނަރުން ކޯމަން ޖެހި ގޯލާއެކު ކުއޯކްލޭންޑް ސިޓީގެ ގޯލު ފޫއެޅުނެވެ. މެޗުގައި ބަޔަންގެ ހެޑް ކޯޗް ވިންސެންޓް ކޮމްޕަނީ ވަނީ އިނގިރޭސި ކެޕްޓަން ހެރީ ކޭން އަދި ޖަރުމަނު ލެޖެންޑް ތޯމަސް މުލަރު ފަދަ ތަރިން ހިމެނޭ ވަރުގަދަ 11 ކުލުންތެރިންނާއެކު މެޗު ފަށާފައެވެ.

ފުރަތަމަ ހާފުގެ މެދުތެރޭގައި ބަޔަން ވަނީ ކުޑަ ވަގުތުކޮޅެއްގެ ތެރޭގައި ތިން ގޯލު ކޮށްފައެވެ. 18 ވަނަ މިނެޓްގައި ސަޗާ ބޯއީ، 20 ވަނަ މިނެޓްގައި މައިކަލް އޮލީސް އަދި 21 ވަނަ މިނެޓްގައި ކޯމަން ވަނީ ގޯލުޖަހާފައެވެ. ފުރަތަމަ ހާފު ނިމުނުއިރު ބަޔަން ވަނީ 6-0 އިން ކުރީގައެވެ.

ދެވަނަ ހާފުގައި ކުރީކޮޅުގައި އޮކްލޭންޑް ސިޓީން ވަނީ ކޮންމެވެސް ވަރަކަށް ޑިފެންސްލައިން ރަނގަޅުކޮށްފައެވެ. ނަމަވެސް، 61 ވަނަ މިނެޓުގައި ކުޅެން ނިކުތް ޖަމާލް މުސިއާލާ ވަނީ ހެޓްރިކެއް ހަދާފައެވެ. މެޗުގެ ފަހު މިނެޓްގައި މުލަރ ވަނީ އޭނާގެ ކެރިއަރުގެ 250 ވަނަ ގޯލު ކާމިޔާބުކޮށްފައެވެ.

ކުލަބް ވޯލްޑްކަޕްގައި ބަޔާން ދެން ނިކުންނާނީ އާރޖެންޓީނާގެ ބޮކާ ޖޫނިއަރސް އާއި ދެކޮޅަށެވެ.