ލިވަޕޫލްގެ ވިންގަރ ލުއިސް ޑިއާޒް، 65.5 މިލިއަން ޕައުންޑަށް ބަޔާން މިއުނިކަށް ވިއްކާލުމަށް ލިވަޕޫލުން އެއްބަސްވެއްޖެއެވެ. މި ޑީލްގެ ދަށުން މިހާރު އޭޝިއާ ޓުއާގައި ހުރި ޑިއާޒްއަށް ޓީމު ދޫކޮށް ދިއުމުގެ ހުއްދަ ލިވަޕޫލުން ވަނީ ދީފައެވެ.

ޑިއާޒްއާއެކު އެއްބަސްވުން އައު ކުރުމަށް ލިވަޕޫލުން ދެ ފަހަރެއްގެ މަތިން މަސައްކަތް ކުރި ނަމަވެސް، ދެ ފަރާތުގެ ޑިމާންޑްތަކުގައި ހުރި ތަފާތުތަކާ ހެދި އެކަން ވަނީ ނުވެފައެވެ. ޕްރިމިއަރ ލީގުގެ 20 ވަނަ ޓައިޓަލް ހޯދުމަށް އެހީތެރިވުމަށްފަހު، ޑިއާޒް ކްލަބް ދޫކޮށް ދިއުމަށް އެދުމުން ލިވަޕޫލުން ވަނީ އެކަމަށް އެއްބަސްވެފައެވެ.

Ad by Hajj Corporation

ލިވަޕޫލްގައި އިތުރު ދެ އަހަރުގެ އެއްބަސްވުމެއް އޮތް ޑިއާޒް ވިއްކާލުމަށް ލިވަޕޫލުން ބޭނުންވެފައި ނުވިނަމަވެސް، ޑިއާޒް އިތުރަށް ލިވަޕޫލުގައި މަޑުކުރަން ބޭނުންނުވުމާއެކު ކޮންޓްރެކްޓުގައި ބާކީ އޮތް އަހަރުތަކަށް ބަލާފައި، ލިވަޕޫލުން ނިންމާފައިވަނީ އެންމެ ރަނގަޅުގޮތަކީ ރަނގަޅުއަގެއްގައި ޑިއާޒް ވިއްކާލުމެވެ. ޑިއާޒްގެ ސޮއި ހޯދަން ބަޔާން މިއުނިކާއެކު ބާސެލޯނާ މަސައްކަތް ކުރިނަމަވެސް، ބާސެލޯނާއިން 60 މިލިޔަން ޔޫރޯއަށްވުރެ ބޮޑު އަދަދެއް ހުށަހަޅަން ދެކޮޅުހަދައެވެ.

މީގެ އިތުރުން ބަޔާން މިއުނިކުން ފުރަތަމަ ހުށަހެޅި 58.5 މިލިއަން ޕައުންޑްގެ އޮފަރ ލިވަޕޫލުން ދެކޮޅު ހެދި ނަމަވެސް، އޭގެ ފަހުން ހުށަހެޅި 65.5 މިލިއަން ޕައުންޑްގެ އޮފަރ ވަނީ ޤަބޫލުކޮށްފައިވެއެވެ. މި މުޢާމަލާތުގެ ޖުމްލަ އަގު އެޑް-އޮންސްތަކާއެކު 75 މިލިޔަން ޔޫރޯއަށް އަރާނެކަމަށް ރިޕޯޓްތައް ބުނެއެވެ.

2022 ވަނަ އަހަރުގެ ޖެނުއަރީ މަހު 37.5 މިލިއަން ޕައުންޑަށް ލިވަޕޫލާ ގުޅުނު ޑިއާޒް، ފަސް އަހަރާއި ހަ މަސް ދުވަހުގެ އެއްބަސްވުމެއްގައި ސޮއިކުރިއެވެ.

މިހާރު ޓޯކިއޯގައި ހުރި ޑިއާޒް، ކުރިއަށް އޮތް 24 ގަޑިއިރުގެ ތެރޭގައި ދަތުރުކުރުމަށް ހަމަޖެހިފައިވާ ކަމަށް ލިވަޕޫލުން މައުލޫމާތު ދީފައިވެއެވެ.