އިނގިރޭސި ޕްރިމިއާ ލީގުގެ ތާވަލުގެ އެންމެ ފުލުގައި އޮތް ވުލްވްސްއިން، މެޗުގެ ފަހު ވަގުތު ކާމިޔާބުކުރި ލަނޑާއެކު 2-1 އިން ލިވަޕޫލް ބަލިކޮށް، މުޅި ދުނިޔެ ސިއްސުވާލައިފިއެވެ. މޯލިނިއު ސްޓޭޑިއަމްގައި ކުޅުނު މި މެޗުން ވުލްވްސް މޮޅުވީ މެޗުގެ 94 ވަނަ މިނެޓުގައި އެންޑްރޭ ފޮނުވާލި ހަމަލާއެއް ލިވަޕޫލްގެ ޑިފެންޑަރު ޖޯ ގޯމޭޒް ގައިގައި ޖެހިފައި ބައިކޮޅަށް ވަން ލަނޑުންނެވެ.

މި މެޗަށް ލިވަޕޫލް ނުކުތީ މޮޅުވެގެން ތާވަލުގެ ގަދަ ހަތަރެއްގެ ރޭހުގައި މެންޗެސްޓާ ޔުނައިޓެޑާއި އެސްޓަން ވިލާއާ އަރާ ހަމަކުރުމުގެ އުންމީދުގައެވެ. ނަމަވެސް، މެޗުގެ ކުރީކޮޅުން ފެށިގެން އާންމުކޮށް ފެންނަ ވަރުގަދަ ކުޅުން ލިވަޕޫލްގެ ފަރާތުން ފެނިފައެއް ނުވެއެވެ. ފުރަތަމަ ހާފުގައި ހޫގޯ އެކިޓިކޭ އާއި ޑޮމިނިކް ސޮބޮސްލާއީ ފޮނުވާލި ހަމަލާތައް ވުލްވްސްގެ ކީޕަރު ހޯސޭ ސާ ވަނީ ދިފާއުކޮށްފައެވެ.

Ad by Hajj Corporation

ދެވަނަ ހާފު ފެށިގެން ލިވަޕޫލަށް ލީޑު ނަގަން ރަނގަޅު ފުރުސަތެއް ލިބުނެވެ. މުހައްމަދު ސަލާހް ނަގައިދިން ކޯނަރަކުން ކޯޑީ ގަކްޕޯ ފޮނުވާލި ބޯޅަ ކާޓިސް ޖޯންސްގެ ގައިގައި ޖެހިފައި ގޯލުގެ ދަނޑިއަށް ވަނީ އަމާޒުވެފައެވެ. ވުލްވްސްއިން މެޗުގެ ލީޑު ނެގީ 78 ވަނަ މިނެޓުގައި އެޓީމުން ގޯލަށް ފޮނުވާލި ފުރަތަމަ ހަމަލާއިންނެވެ. ބަދަލު ކުޅުންތެރިޔާ ޓޯލޫ އަރޮކޮޑަރޭ ތަނަވަސްކޮށްދިން ފުރުސަތަކުން މި ލަނޑު ކާމިޔާބުކޮށްދިނީ ރޮޑްރިގޯ ގޯމޭޒްއެވެ.

ލިވަޕޫލުން މެޗުގެ ނަތީޖާ ހަމަހަމަކުރީ އޭގެ ފަސް މިނެޓު ފަހުންނެވެ. ވުލްވްސްގެ ބެލެގާޑޭއަށް ހެދުނު ގޯހެއްގެ ފައިދާ ނަގައި، މުހައްމަދު ސަލާހް ވަނީ ހިތްގައިމު ގޯލެއް ކާމިޔާބުކޮށްފައެވެ. ނަމަވެސް، މެޗު ނިމެން ސިކުންތުކޮޅަކަށް ވެފައި ވަނިކޮށް އެންޑްރޭ ފޮނުވާލި ބޯޅަ ގޯމޭޒް ގައިގައި ޖެހިފައި މިސްރާބު ބަދަލުވެގެން ގޯލަށް ވަނުމުން، ލިވަޕޫލްގެ ކީޕަރު އެލިސަންއަށް އެ ބޯޅަ ހުއްޓުވޭ ގޮތެއް ނުވިއެވެ.

މިއީ ޕްރިމިއާ ލީގުގެ ތާރީޚުގައި ތާވަލުގެ އެންމެ ފުލުގައި އޮތް ޓީމަކުން، އެންމެ ފަހުގެ ޗެމްޕިއަނުންގެ މައްޗަށް 90 މިނެޓު ފަހުން ލަނޑު ޖަހައި މޮޅުވި ފުރަތަމަ ފަހަރެވެ. ވުލްވްސްއިން މިވަނީ ޖެހިޖެހިގެން ދެ މެޗުގައި ތާވަލުގެ ގަދަ ފަހެއްގެ ދެ ޓީމު (އެސްޓަން ވިލާ އަދި ލިވަޕޫލް) ބަލިކޮށްފައެވެ. އަނެއްކޮޅުން، ލިވަޕޫލަކީ މި ސީޒަނުގައި 90 މިނެޓު ފަހުން ޖެހި ލަނޑުތަކުން އެންމެ ގިނަ މެޗު (5 މެޗު) ބަލިވި ޓީމެވެ.

މި ނަތީޖާއާއެކު ލިވަޕޫލަށް ޗެންޕިއަންސް ޅިގުގެ ޖާގައިގެ ރޭހުގައި ބޮޑު ހުރަހެއް ކުރިމަތިވެފައިވާއިރު، ވުލްވްސްއިން ވަނީ ރެލިގޭޝަނުން ސަލާމަތްވުމަށް ކުރާ މަސައްކަތުގައި އުންމީދީ ދެ މޮޅު ހޯދާފައެވެ.