އެމެރިކާގައި ކުޅެމުންދާ ފީފާ ކްލަބް ވޯލްޑް ކަޕް 2025 ގެ ގްރޫޕް ސީގެ އެންމެ ފޯރިގަދަ މެޗުގައި ބަޔާން މިއުނިކުން އާރޖެންޓީނާގެ ގަދަބާރެއްކަމުގައިވާ ބޮކަ ޖޫނިއަރސް ބަލިކޮށްފިއެވެ. ހާޑް ރޮކް ސްޓޭޑިއަމްގައި ކުޅުނު މި މެޗު ނިމުނީ 2-1 އިންނެވެ. މިއީ މި މުބާރާތުގައި ދެކުނު އެމެރިކާގެ ޓީމަކާ ދެކޮޅަށް ޔޫރަޕިއަން ޓީމަކުން ހޯދި ފުރަތަމަ މޮޅުވުމެވެ.

63،587 ސަޕޯޓަރުންގެ ކުރިމަތީގައި ކުޅުނު މި މެޗާއެކު ބަޔަން މިއުނިކް ވަނީ 6 ޕޮއިންޓާއެކު ގްރޫޕްގެ އެއްވަނައިގައި ހިފަހައްޓާފައެވެ. އަދި މިމޮޅާއެކު ބަޔާން ވަނީ މުބާރާޓުގެ ގަދަ 16 އަށް ދަތުރުކޮށްފައެވެ. ބެންފިކާ އޮތީ 4 ޕޮއިންޓާއެކު ދެވަނައިގައެވެ. ބޮކަ ޖޫނިއަރސް އޮތީ އެންމެ ޕޮއިންޓަކާއެކު ތިންވަނައިގައެވެ. އޯކްލޭންޑް ސިޓީ އަދިވެސް ވަނީ ޕޮއިންޓެއް ނުލިބިއެވެ.

Ad by Hajj Corporation

މެޗުގެ 18 ވަނަ މިނެޓްގައި ހެރީ ކޭން ވަނީ ބަޔާން އަށް ލީޑު ނަގައިދީފައެވެ. މިގޯލުގެ އިތުރުންވެސް ބަޔާންއަށް ވަނީ ގޯލުޖަހާނެ ގިނަ ފުރުސަތުތަކެއް ފުރަތަމަ ހާފުގައި ލިބިގެން ގޮސްފައެވެ.

ދެވަނަ ހާފުގައި ބޮކަ ޖޫނިއަރސް އިން ވަނީ ކުޅުން ރަނގަޅުކޮށް 66 ވަނަ މިނެޓުގައި މެޗުގެ ނަތީޖާ ހަމަހަމަ ކޮށްފައެވެ. މެޗުން ބަޔާން މޮޅުވި ގޯލުޖަހައިދިނީ 84 ވަނަ މިނެޓުގައި މައިކަކް އޮލީސޭ އެވެ.

މިއީ ދެކުނު އެމެރިކާގެ ޓީމަކާ ދެކޮޅަށް މިމުބާރާތުގައި ޔޫރަޕުގެ ޓީމަކުން ހޯދި ފުރަތަމަ މޮޅެވެ.