ގަތަރުގެ ދޯހާ ގައި ހުންނަ އެމެރިކާގެ އަލް-ޢުދައިދު ވައިގެ އަސްކަރީ މަރުކަޒަށް ދިން ޙަމަލާއަކީ އެއްގޮތަކަށްވެސް ގަތަރު ސަރުކާރާ ދެކޮޅަށް ދިން ހަމަލާއެއް ނޫންކަމަށް އިރާނުން ބުނެފިއެވެ.

ފާރިސްކަނޑުގެ ގުޅިފައިވާ ޤައުމުތަކުގެ ކައުންސިލް (ޕީ.ޖީ.ސީ.ސީ) ގެ ޚާރިޖީ ވަޒީރުންގެ ކުއްލި ބައްދަލުވުމުގައި ނެރެފައިވާ ބަޔާނަކާ ގުޅިގެން އިރާނުގެ ސަރުކާރުގެ ތަރުޖަމާނު އިސްމާއިލް ބަޤާއީ ވިދާޅުވީ އިރާނުން އެމެރިކާގެ އަލް-ޢުދައިދު އަސްކަރީ މަރުކަޒަށް ދިން ޙަމަލާއަކީ، ޔުނައިޓެޑް ނޭޝަންސްގެ ޗާޓަރުގެ 51 ވަނަ މާއްދާގައި ބަޔާންކޮށްފައިވާ ގޮތުގެ މަތިން އިރާނުގެ ރައްކާތެރިކަމަށްޓަކައި އެ ޤައުމަށް ލިބިފައިވާ ޤާނޫނީ ޙައްޤުގެ ތެރެއިން ދިން ޙަމަލާއެއް ކަމަށެވެ.

އަދި މި ޙަމަލާ ދީފައިވަނީ 2025 ވަނަ އަހަރުގެ ޖޫން މަހުގެ 22 ވަނަ ދުވަހު އިރާނުގެ ސަރަޙައްދީ އަދި ޤައުމީ ސިޔާދަތަށް ނުރައްކާކޮށް އެމެރިކާއިން ދިން ޙަމަލާތަކަށް ރައްދު ދިނުމުގެ ގޮތުން ކަމަށްވެސް އޭނާ ވިދާޅުވިއެވެ. މި ޙަމަލާއަކީ ޤަތަރުގެ އިސްލާމީ އަޚްވަންތަ ސަރުކާރާ ދެކޮޅަށް ދިން ޙަމަލާއެއްގެ ގޮތުގައި ތަރުޖަމާ ނުކުރެވޭނެ ކަމަށްވެސް އޭނާ ވިދާޅުވިއެވެ.

މިފުރުސަތުގައި ބަޤާއީ ވަނީ ހަނގުރާމައިގައި އިރާނާއެކު ތިބި ގައުމުތަކަށް ޝުކުރު އަދާކުރައްވާފައެވެ.

ގަތަރު ހިމެނޭހެން ފާރިސްކަނޑުގެ އައްސޭރީގައިވާ ހުރިހާ ގައުމުތަކާއެކު އޮތް ގުޅުން އިތުރަށް ހަރުދަނާކުރުމަށް އިރާނުން ގަސްތުކުރާ ކަންވެސް ތަރުޖަމާނު ވަނީ ހާމަކުރައްވާފައެވެ. އަދި ފަލަސްތީނުގެ ޣައްޒާގައި ޔަހޫދީން ހިންގަމުން އަންނަ ގަތުލުއާއްމު ވަގުތުން ހުއްޓާލުމަށްވެސް އޭނާ ވަނީ ގޮވާލައްވާފައެވެ.