ކުޑަކުދިން ޝަހީދުކުރާ ސަހުޔޫނީ ދައުލަތަށް އެއްވެސް ހަނގުރާމައަކުން ނަސްރެއް ނުލިބޭނެކަމަށް ބުނެ އިރާނުގެ ސިފައިންގެ ޗީފް އޮފް ސްޓާފް މޭޖަރ ޖެނެރަލް އަބްދުލްރަޙީމް މޫސަވީ ސަހުޔޫނީ އިސްރާއީލަށް ހޫނު ބަހުގެ ހަމަލާތަކެއް ދެއްވައިފިއެވެ.

މިދިޔަ ޖޫން މަހު ޔަހޫދީންނާއި އެމެރިކާގެ ހަމަލާތަކުގައި ޝަހީދުވި އީރާނުގެ ބައެއް ކޮމާންޑަރުންގެ ހަނދާން އާކުރުމަށް ބޭއްވުނު ޖަލްސާއެއްގައި ވާހަކަފުޅުދައްކަވަމުން ޖެނެރަލް މޫސަވީ ވިދާޅުވީ ހަނގުރާމައަށްފަހު އީރާނުގެ ދިފާޢީ ބާރު ދުޝްމަނުންނާ ދެކޮޅަށް އަލުން ފުރިހަމަކޮށްފައިވާކަމަށެވެ.

Ad by Hajj Corporation

ޖެނެރަލް މޫސަވީ ވަނީ އޭނާގެ ވާހަކަފުޅުގައި އީރާނުގެ ރައްޔިތުންނަށް ވަރަށް ބޮޑަށް ތައުރީފުކުރައްވާފައެވެ. މިގޮތުން ހަނގުރާމައިގެ މައިދާނުގައި، އީރާނުގެ ރައްޔިތުންނަކީ ގައުމީ ދިފާއި ބާރުގެ ބިންގަލުގެ ގޮތުގައި އޭނާވަނީ އިރާނުގެ ރައްޔިތުން ސިފަކުރައްވާފައެވެ. ޖެނެރަލް މޫސަވީ ވިދާޅުވީ އިރާނުގެ ކޮންމެ އާއިލާއަކީ ދުޝްމަނުންގެ ހަމަލާތަކާ ދެކޮޅަށް ތައްޔާރުކޮށްފައިވާ ކުދި ފައުޖުތަކެއްކަމަށެވެ.

ސަހުޔޫނީން ބޭނުންވީ އިރާނު ދާހިލީ ހަމަނުޖެހުމެއްގެ ތެރެއަށް ވައްޓާލަންކަމަށާއި ނަމަވެސް އެ ނާޒުކު ދަނޑިވަޅުގައި އިރާނުގެ ރައްޔިތުންގެ ހިތައް މާތް ﷲ ވެއްދެވި އެއްބައިވަންތަކަމަކީ އެކަމަށްޓަކައި އެކަނލާނގެ ހަޒުރަތަށް ފަށްފަށުން ޝުކުރު އަދާކުރާކަމެއްކަމަށް ޖެނެރަލް މޫސަވީ ވިދާޅުވިއެވެ.

ޖެނެރަލް މޫސަވީ އިތުރަށް ވިދާޅުވީ ކުޑަކުދިން ގަތުލުކުރާ ސަހުޔޫނީ ދައުލަތަކަށް ދުވަހަކުވެސް މުސްތަގުބަލެއް ނެތްކަމަށާއި ޔަހުދީން ދަތުރުކުރަމުންދަނީހަލާކުގެ މަގާ ދިމާލަށްކަމަށެވެ.

އީރާނުގެ ނިއުކްލިޔަރ މަޝްރޫއު ހުއްޓުވުމަށް ކަމަށް ބުނެ ޔަހޫދީން އިސްވެ އީރާނަށް ހަމަލާދޭން ފެށީ ޖޫން މަހުގެ 13ވަނަ ދުވަހުއެވެ. އެ ހަމަލާތަކާ ގުޅިގެން އީރާނުން ވެސް ވަނީ ޔަހޫދީންނާ ދެކޮޅަށް އޮޕަރޭޝަން ޓްރޫ ޕްރޮމިސް 3ގެ ނަމުގައި ހާއްސަ އަސްކަރީ ހަރަކާތެއް ފަށައި، ޔަހޫދީންނަށް ބޮޑެތި ގެއްލުންތައް ދީފައެވެ. އެއަށްފަހު ޖޫން މަހުގެ 22ވަނަ ދުވަހު އެމެރިކާއިން ވަނީ މައްސަލައިގެ ތެރެއަށްވަދެ، އީރާނުގެ މައި ތިން ނިއުކްލިޔަރ މަރުކަޒަކަށް ބޮން އަޅައިފައެވެ. އެ ހަމަލާގެ ރައްދެއްގެ ގޮތުން އައު އަސްކަރީ ހަރަކާތެއް ފަށައި، އީރާނުން ވަނީ ގަތަރުގައި ހުންނަ އެމެރިކާގެ އަލް އުދައިދު އަސްކަރީ މަރުކަޒަށް ހަމަލާ ދީފައެވެ.

12 ދުވަހަށް ދެމިގެންގޮސްފައިވާ ހަނގުރާމަ މެދުކަނޑާލަން އެއްބަސްވި އިރު އިރާނުން ބުނަނީ ޔަހޫދީން ހަމަލާއެއް ދީފިނަމަ އަދިވެސް ރައްދު ދޭނެކަމަށެވެ. އަދި ހަނގުރާމައިގެ ނަސްރުވެސް އިރާނުންވަނީ ކުލަގަދަކޮށް ފާހަގަކޮށްފައެވެ.