ފުލުހެއްގެ ގައިގައި ސައިކަލުން ޖެއްސުމަށްފަހު ފިލި މައްސަލައިގައި އަނެއްްކާވެސް މީހަކު ހައްޔަރުކޮށްފިއެވެ.

މީގެ ހަފްތާއެއް ކުރިންވެސް މިފަދަ މައްސަލައެއްގައި މީހަކު ހައްޔަރު ކުރިއެވެ. އެއިރު ހައްޔަރުކޮށްފައި ވަަނީ އުމުރުން 23 އަހަރުގެ ދިވެހި ފިރިހެނެކެވެ.

ފުލުހުން މިއަދު ވިދާޅުވީ، މިދިޔަ އަންގާރަ ދުވަހު ރޭ ހެންވޭރު ދަނޑު ކައިރީގައި ވީސީޕީގައި ފުލުހުން ހަރަކާތްތެރިވަމުން ދިޔައިރު، ޅ. ކުރެންދޫ މަގުމަތީގެ އަލީ ސަމާހް މުހައްމަދު 24އ. ބާރު ސްޕީޑްގައި ސައިކަލު ދުއްވުމުން އޭނާ ގާތު މަޑު ކުރަން ބުނުމުން ފުލުހެއްގެ ގައިގައި ސައިކަލުން ޖައްސައި މަޑުނުކޮށް ފިލައިގެން ގޮސްފައިވާ ކަަމަށެވެ.

މި މައްސަލައާ ގުޅިގެން އިއްޔެ ކޯޓު އަމުރެއްގެ ދަށުން އޭނާ ވަނީ ހައްޔަރުކޮށްފައެވެ.

އަދި އޭނާގެ ބަންދާއި މެދު ގޮތެއް ނިންމަށް މިއަދު ކްރިމިނަލް ކޯޓަށް ހާޒިރު ކުރުމުން އެ ކޯޓުން އޭނާގެ ބަންދަށް 10 ދުވަސް ވަނީ ޖަަހައިފައެވެ.

ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.