ފޭރުމުގެ މައްސަލައެއްގައި ހިމެނޭ 3 މީހަކަށް ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ފޮނުވައިފިއެވެ.

މިކަން ހާމަކޮށް ޕީޖީ އޮފީހުން ބުނީ މިއަހަރުގެ ޖުލައިމަހުގެ 24 ވަނަ ދުވަހުގެ ވަގުތެއްގައި ދިލްބަހާރުމަގު މއ. މަސްފަން ގެ ކައިރީގައި ހުރި މީހަކަށް ގޮވައި އޭނާ މަސްފަންއަށް ވައްދައި ވަޅިން ބިރު ދައްކާ އޮރިޔާންކޮށް އަނިޔާކުރުމަށްފަހު އޭނާގެ ފޯނު އަތުލައި އޭނާގެ އެކައުންޓުން ފައިސާ ޓްރާންސްފާކޮށް އަދި އޭނާގެ ކޭޝް ކާޑް ބޭނުންކޮށްގެން އޭޓީއެމްއިން ފައިސާ ނަގާފައިވާ މައްސަލައިގައި ދައުވާކުރުމަށް ކްރިމިނަލް ކޯޓަށް ހުށަހަޅާފައިވާކަމަށެވެ.

މައްސަލައިގެ ދަޢުވާލިބޭ ފަރާތްތަކަކީ:

1. ސ. ހިތަދޫ، ސޯމާ، ޝަފީޤު އިބްރާހީމް

2. މއ. މަސްފެން، މުޙައްމަދު ރީހާން.

3. މއ. މަސްފެން، ޢާއިޝަތު

މި މީހުންގެ މައްޗަށް ޕީޖީ އޮފީހުން އުފުލާފައިވާ ދަޢުވާތައް:

1. ދިވެހިރާއްޖޭގެ ޤާނޫނުލްޢުޤޫބާތު ގެ 120 ވަނަ މާއްދާގެ ދަށުން - އަނިޔާއެއް ދިނުން

2. ދިވެހިރާއްޖޭގެ ޤާނޫނުލްޢުޤޫބާތު ގެ 232 ވަނަ މާއްދާގެ ދަށުން – އެނގިހުރެ ހުއްދަނޫން ގޮތެއްގައި މަޢުލޫމާތު ހޯދުން

3. ދިވެހިރާއްޖޭގެ ޤާނޫނުލްޢުޤޫބާތު ގެ 213 ވަނަ މާއްދާގެ ދަށުން - ފޭރުން

ފުލުހުން މި މައްސަލައިގެ ތަހުގީގު ނިންމާ ދައުވާކޮށްދިނުމަށް އެދި ޕީޖީ އޮފީހަށް ފޮނުވީ ސެޕްޓެމްބަރުމަހުގެ 9ވަނަ ދުވަހުއެވެ.