ހިއުމަން ޕެޕިލޯމާ ވައިރަސް (އެޗް.ޕީ.ވީ) އިން ޖެހޭ ކެންސަރ ތަކުން ރައްކާތެރިވުމަށް، މާލެ ސަރަހައްދުގެ 5 ސުކޫލަކުން ޖުމްލަ 505 ދަރިވަރަކަށް އެޗް.ޕީ.ވީ ވެކްސިން ދީފިއެވެ.

ހެލްތް މިނިސްޓްރީން ބުނެފައިވާގޮތުގައި މި ހަރަކާތަކީ ދުނިޔޭގެ ވެކްސިން ހަފްތާ އާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ސުކޫލުތައް ގުޅިގެން ކުރިއަށް ގެންދިޔަ މުހިންމު މަސައްކަތެކެވެ.

މި ވެކްސިން ދިނުމުގެ ޕްރޮގްރާމް ކުރިއަށް ގެންގޮސްފައިވަނީ ޖޫން މަހުގެ ތެރޭގައެވެ. ދުނިޔޭގެ ވެކްސިން ހަފްތާއާ ގުޅިގެން ރޭވުނު މި ހަރަކާތުގެ މައިގަނޑު މަގުސަދަކީ، ޤައުމީ ވެކްސިން ތާވަލުގައި ހިމެނޭ ވެކްސިންތަކުގެ ކަވަރޭޖް ރަނގަޅުކޮށް، ރައްކާތެރި މުޖުތަމައެއް ބިނާކުރުމެވެ.

މި ހަރަކާތުގައި ބައިވެރިވި ސުކޫލުތަކުގެ ތެރޭގައި އިމާދުއްދީން ސްކޫލް، ސަލާހުއްދީން ސްކޫލް، ބްރައިޓްވޭ އިންޓަރނޭޝަނަލް ސްކޫލް، އަމީނިއްޔާ ސްކޫލް އަދި ފިންލޭންޑް އިންޓަރނޭޝަނަލް ސްކޫލް ހިމެނެއެވެ.

އެޗް.ޕީ.ވީ ވެކްސިންއަކީ 2019 ވަނަ އަހަރުން ފެށިގެން ދިވެހިރާއްޖޭގެ ޤައުމީ ވެކްސިން ތާވަލުގައި ހިމަނައިގެން، ޚާއްސަކޮށް 10 އަހަރުގެ އަންހެން ކުދިންނަށް ދެވެމުން އަންނަ ވެކްސިންއެކެވެ.

މި ވެކްސިންއަކީ ހިއުމަން ޕެޕިލޯމާ ވައިރަސްގެ ސަބަބުން ޖެހޭ ކެންސަރ (މިސާލަކަށް ރަހިމުގެ ކެންސަރު) ތަކުން ރައްކާތެރިވުމަށް އެޅޭ އެންމެ މުހިންމު އެއް ފިޔަވަޅެވެ. އެޗް.ޕީ.ވީ ފެތުރުން މަދުކުރުމަށްޓަކައި ވެކްސިން ޖަހާ އާބާދީ ބޮޑުކޮށް ކަވަރޭޖް އިތުރުކުރުމަކީ ސިއްހީ ގޮތުން ވަރަށް މުހިންމު ކަމެއްކަން ހެލްތް މިނިސްޓްރީން ފާހަގަކުރެއެވެ.