ތ. ވިލުފުށީގައި އިމާރާތްކޮށްފައިވާ 100 ހައުސިންގ ޔުނިޓަށް ފެނާއި ނަރުދަމާގެ ޚިދުމަތް ދިނުމަށް ބޭނުންވާ ވިއުގަ ޤާއިމްކުރުމުގެ ޕްރޮޖެކްޓް ފެނަކަ ކޯޕަރޭޝަން ލިމިޓެޑްއާއި ހަވާލުކޮށްފިއެވެ.

މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓްގައި ބޭއްވި ރަސްމިއްޔާތެއްގައި މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ޓޫރިޒަމް އެންޑް އެންވަޔަރަންމަންޓް އަލީ ފާރިސް ޔޫސުފްއެވެ. އަދި ފެނަކައިގެ ފަރާތުން މި އެއްބަސްވުމުގައި ސޮއި ކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ޢާރިފްއެވެ.މި ކޮންޓްރެކްޓްގެ ޖުމްލަ އަގަކީ 13،809،463.64 (ތޭރަ މިލިއަން އަށް ލައްކަ ނުވަ ހާސް ހަތަރު ސަތޭކަ ފަސްދޮޅަސް ތިން ރުފިޔާ ފަސްދޮޅަސް ހަތަރު ލާރިި) އެވެ.

މި މަސައްކަތް ނިންމުމަށް ހަމަޖެހިފައިވަނީ ސޮއިކުރާ ތާރީޚުން ފެށިގެން 8 މަސް ދުވަހުގެ ތެރޭގައެވެ.