ދުނިޔޭގެ އެންމެ މުއްސަނދި ބިލިޔަނަރު ޓެސްލާ އާއި ސްޕޭސްއެކްސްގެ އިސްވެރިޔާ އިލޮން މަސްކް، އެމެރިކާގައި އާ ސިޔާސީ ޕާޓީއެއް އުފެއްދުމަށް ނިންމަވައިފި ކަމަށް މިއަދު އިއުލާން ކުރައްވައިފިއެވެ.

އޭނާ މިކަން ޢިއުލާން ކުރެއްވީ އޭނާގެ ސޯޝަލް މީޑިއާ ޕްލެޓްފޯމް އެކްސް މެދުވެރިކޮށެވެ.

އެކްސްގައި ކުރެއްވި ޕޯސްޓެއްގައި މަސްކް ވިދާޅުވީ އޭނާ އުފައްދާ ޕާޓީ އަކީ "އެމެރިކާ ޕާޓީ" ކަމަށެވެ. އަދި އެ ޕާޓީން އެގައުމުގައި މިހާރު އޮތް އެންމެ ބޮޑު ދެ ޕާޓީ ކަމަށްވާ ރިޕަބްލިކަން އަދި ޑިމޮކްރެޓިކް ޕާޓީއާ ޗެލެންޖު ކުރާނެ ކަމަށް ވިދާޅުވެފަވެއެވެ.

"މިއަދު، އެމެރިކާ ޕާޓީ އުފެދިއްޖެ. ތިޔަބައިމީހުންގެ މިނިވަންކަން އަނބުރާ ދިނުމަށްޓަކައި، ދެބައިކުޅަ އެއްބައި މީހުން ބޭނުންވަނީ އައު ސިޔާސީ ޕާޓީއެއް. އަދި އެކަން ތިޔަބައިމީހުންނަށް ލިބޭނެ!" އޭނާ ލިޔުއްވާފަވެއެވެ.

މަސްކް ޕާޓީއެއް ހައްދަވާނެކަން ޢިއުލާންކުރަށްވާފައި މިވަނީ އެމެރިކާގެ ރައީސް ޑޮނަލްޑް ޓްރަމްޕާއި ޖެހުނު މައްސަލަ ހައްލުނުވެ ގޯހުން ގޯހަށް ދިޔުމަށްފަހުއެވެ.

މި ހަފްތާގެ ކުރީކޮޅު ޓްރަމްޕް ވަނީ މަސްކްގެ ކުންފުނިތަކަށް ފެޑެރަލް ސަރުކާރުން ދެމުންދާ ބިލިއަން ޑޮލަރުތަކުގެ ސަބްސިޑީތައް ހުއްޓާލާނެ ކަމުގެ އިންޒާރު ދެއްވާފައެވެ. އަދި މަސްކްގެ ވިސާ ކެންސަލްކޮށް އޭނާގެ އަސްލު ޤައުމުކަމަށްވާ ދެކުނު އެފްރިކާއަށް ފޮނުވާލާނެކަމުގެ އިންޒާރު ދެއްވާފައި ވެއެވެ.