އެމް.ޕީ.އެލް އިން އިހަވަންދޫއަށް ކްރޭނެއް ހަދިޔާކޮށްފިއެވެ.

އެމް.ޕީ.އެލް އިން އިހަވަންދޫ ކައުންސިލަށް ހަދިޔާކުރީ "ކޮބެލްކޯ" ބްރޭންޑްގެ 25 ޓަނުގެ ކްރޭނެކެވެ. މި ކްރޭން ހަދިޔާކޮށްފައިވަނީ އިހަވަންދޫ ކައުންސިލުގެ އެދުމުގެ މަތީންނެވެ.

މިކްރޭން ހަވާލުކޮށްފައިވަނީ އުތުރު މެރިޓައިމް ސަރވިސް (ޔޫ.އެމް.އެސް)ގެ ދަށުން ޚިދުމަތް ފޯރުކޮށްދިނުމަށް އިހަވަންދޫގައި ޑޮކްޔާޑާއި ސްލިޕްވޭ ތަރައްޤީކުރުމުގެ އެއްބަސްވުމުގައި ސޮއިކުރުމުގެ ހަފްލާގައެވެ، މިހަފްލާ ކުރިއަށް ގެންގޮސްފައިވަނީ އިހަވަންދޫ ބަނދަރު ސަރަހައްދުގައެވެ.

އެމްޕީއެލް ގެ ފަރާތުން މި އެއްބަސްވުމުގައި ސޮއިކުރެއްވީ އެކުންފުނީގެ ސީއީއޯ މުޙައްމަދު ވަޖީހުއެވެ. އަދި ކައުންސިލުގެ ފަރާތުން ސޮއި ކުރެއްވީ ކައުންސިލްގެ ރައީސް ރައީސް އަޙްމަދު ޞަބާޙްއެވެ. އެމްޕީއެލް ގެ ސީއީއޯ މުހައްމަދު ވަޖީހު ވަނީ އިހަވަންދޫގައި ޑޮކްޔާޑާއި ސްލިޕްވޭ ތަރައްޤީކުރުމުގެ ކުރުމުގު މުހިއްމުކަން ފާހަގަކޮށް އަވަސް މުއްދަތެއްގެ ތެރޭގައި އެކަމުގެ އަމަލީ މަސަައްކަތްތައް ފެށޭނެ ކަމުގެ ޔަގީންކަން ދެއްވާފައެވެ. އަދި މި މަޝްރޫއަކީ އުތުރުގައި ދޭ މެރިޓައިމްގެ ޚިދުމަތްތަކުގެ މުހިއްމު އެއްބައި ކަމަށް ވެސް ވަޖީހު ވަނީ ވިދާޅުވެފައެވެ. މީގެ އިތުރަށް ވަޖީހު ވިދާޅުވީ ކައުންސިލްތަކުން އެދޭ ކަންތައްތައް އެމް.ޕީ.އެލްގެ އިޖުތިމާއީ ޒިންމާގެ ދަށުން ފުރިހަމަކޮށްދިނުމަށް މަސައްކަތްކުރާނެކަމަށެވެ.

ބަންކަރިންގެ ޙިދުމަތް ދިނުމަށް "އުތުރު އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" ގެ ނަމުގައި އައު އިމާރާތެއް މިމަހުގެ 19 ދުވަހު ވަނީ އުލިގަމުގައި ގާއިމްކޮށްފައެވެ. އެ ޚިދުމަތަށް، ނެދަލޭންޑްސްގެ "ވިޓޯލް" ކުންފުންޏާއި އެސްޓީއޯއައި ދެމެދު ބައިނަލްއަގުވާމީ ފެންވަރެއްގައި ބަންކަރިންގެ ޚިދުމަތް ފޯރުކޮށްދިނުމަށް އެއްބަސްވުމެއް އެކުލަވާލައި ސޮއިކުރީ މިއަހަރުގެ މާޗް މަހުގެ 13 ވަނަ ދުވަހުއެވެ. މިއިމާރާތަކީ ބަންކަރިންގެ ޙިދުމަތްދޭ މުވައްޒަފުންނަށް އަމާޒުކޮށްގެން ބައިންލައަގުވާމީ ފެންވަރަށް ތަރައްގީކޮށްފައިވާ ތަނެއް ކަމަށް އެމްޕީއެލް ވަނީ ބުނެފައެވެ.

ސަރުކާރުގެ އަމާޒަކީ މި ސަރަހައްދުން ދަތުރުކުރާ ބޯޓުތަކަށް "އުތުރު އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" ޙިދުމަތްތައް ފޯރުކޮށްދީ އެ ސަރަހައްދުގެ ބޭނުން އިގްތިސާދީ ގޮތެއްގައި ހިފުމަށެވެ. އިކޮނޮމިކް މިނިްޓަރު މުހައްމަދު ސައީދު ވިދާޅުވީ މުޅިން އަލަށް ފެށި މި ޙިދުމަތުގެ ސަބަބުން 400 މިލިއަން ޑޮލަރު އިގްތިސާދަށް އިތުރުވެގެންދާނެ ކަމަށެވެ.