ސްރީ ލަންކާގެ ތާރީޙުގައި އެ ޤައުމުގެ އިޤްތިސާދީ ހާލަތު އެ ޤައުމުގެ ތާރީޙުގައި ދުވަހަކުވެސް ގޯސްނުވާ މިންވަރަށް ގޯސްވެ، ތަކެތީގެ އަގު އިންތިހާއަށް އުފުލުމުގެ ސަބަބުން 2022 ވަނަ އަހަރު އެ ޤައުމުގެ އޭރުގެ ސަރުކާރު ނިމުމަކަށް ގެނުވި ބޮޑު ހަމަނުޖެހުންތަކަށްފަހު ބާއްވާ ފުރަތަމަ ރިޔާސީ އިންތިޙާބުގައި ރައްޔިތުން ނިކުމެ ވޯޓުލުން ކުރިއަށް އެބަދެއެވެ. އެ ޤައުމުގައި މިއަދު މި ނަގާ ވޯޓަކީ އެ ޤައުމުގެ އިޤްތިސާދީ މަގުޗާޓު ބައްޓަން ކުރާނެ ނިންމުމަކަށްވާނެއެވެ.

މިއަދު ކުރިއަށްދާ އިންތިޙާބުގައި ރައްޔިތުން ނިކުމެ ވޯޓުލާއިރި ތަކެތިން ނަގާ ޓެކްސް ބޮޑުވުމާއި، ސަބްސިޑީތައް ކަނޑާލުމުގެ އިތުރުން ސަރުކާރުން ފޯރުކޮށްދެމުންދިޔަ އެކިއެކި އިޖްތިމާއީ ރައްކާތެރިކަމުގެ އެހީތައް ކަނޑާލާފައިވުމުގެ ސަބަބުން އެ ޤައުމުގައި ދިރިއުޅޭ ރައްޔިތުންދަނީ ބޮޑު ނުތަވަސްކަމެއް ތަހައްމަލުކުރަމުންނެވެ.

ވޯޓުލާން ނިކުތް ގިނަ މީހުން ފާޅުކޮށްފައިވާ ޝުޢޫރުތަކަށްބަލާއިރު އެ ޤައުމުގެ ގިނަ ރައްޔިތުން ބޭނުންވަނީ ސްރީލަންކާގެ އިޤްތިސާދު ހަމަމަގަށްއަޅުވައި، ރައްޔިތުންގެ ފުދުންތެރިކަން އިތުރުކުރުވާނެ ހަރުދަނާ ލީޑަރެކެވެ. ހަމަ އެއާއިއެކު އެ ޤައުމުގެ ޕޮލިޓިކަލް ސިސްޓަމް ބަދަލުކޮށް ކޮރަޕްޝަނާއި ފަސާދައަށް ހުޅުވިފައިވާ ދޮރުތައް ބަންދުކުރުމަށް ބޭނުންވާ ހަރުދަނާ ނިޒާމެއް އެކުލަވާލާނެ ވެރިއަކު އިންތިޙާބުވުމަށް ރައްޔިތުން ކުރާ އުންމީދުވެސް ކުޑައެއްނޫނެވެ.

2022 ވަނަ އަހަރު ރައްޔިތުންގެ އުތުރިއެރުމާއި ގުޅިގެން އޭރު ވެރިކަމުގައި ހުންނެވި ރައީސް ގޮތަބަޔާ ރާޖަ ޕަކްސާ ޤައުމު ދޫކުރައްވާ ފިއްލެވުމަށް އެ ޤައުމު ހިންގުމުގެ މަސްޢޫލިއްޔަތު ހަވާލު ކުރެވުނީ ކުރީގެ ބޮޑު ވަޒީރު ރަނިލް ވިކްރަމަ ސިންހާއެވެ. އޭގެ ކުޑަދުވަސްކޮޅެއްފަހުން އެ ޤައުމުގެ ޤާނޫނު ހަދާ މަޖުލިހުންވަނީ ރަނިލްއަށް ރައީސް ކަމުގެ މަޤާމު ހަވާލުކުރައްވާފައެވެ.

މިއަދު ސްރީ ލަންކާގައި ކުރިއަށްދާ ރިޔާސީ އިންތިޙާބުގައި ރަނިލް ވަދާކުރައްވާއިރު، ކުރީގެ ރައީސް ގޮތަބަޔާ ރަޖާ ޕަކްސާއާއި އޭނާގެ އާއިލާ އިންސާފުގެ ކުރިމައްޗަށް ގެނައުމުގައި ފަސްޖެހި އެ ފަރާތަކަށް ހިމާޔަތްދޭކަމުގެ ތުހުމަތު ރަނިލްއަށްކުރެއެވެ. ނަމަވެސް ރައްޔިތުންގެ މި ތުހުމަތުތަކަށް ރަނިލް އިންކާރު ކުރައްވައެވެ. ކޮރަޕްޝަނާއި ދެކޮޅަށް އަޑުއުފުލައި ހިންގަވާ ކެންޕޭނުތަކުގެ ސަބަބުން އިންތިޙާބުގައި ވާދަކުރައްވާ ވާތުފިޔައިގެ ކެންޑިޑޭޓު އަނުރަ ކުމަރަ ޑިސަނަޔަކޭއަށް ބޮޑު ތާއީދެއް އޮތްކަމަށް މަޝްރަހު ދިރާސާކުރާ ފަރާތްތަކުން ހާމަކުރެއެވެ. ރަނިލްއާއި ޑިސަނަޔަކަގެ އިތުރުން ސްރީލަންކާގެ އިދިކޮޅު ޕާޓީގެ ލީޑަރު ސަޖިތު ޕްރަމަދާސައާއި ކުރީގެ ރައީސް މަހިންދަ ރާޖަ ޕަކްސަގެ ދަރިކަލުން ނަމާލް ރާޖަ ޕަކްސަވެސް މިއަދު އިންތިޙާބުގައި ވާދަކުރައްވައެވެ.

އާބާދީގައި 22 މިލިއަން މީހުން ދިރިއުޅޭ ސްރީލަންކާގައި ވޯޓު ލުމުގެ ހައްޤު ލިބިފައިވާ 17 މިލިއަނެއްހައި މީހުން ދއެބަތިއްބެވެ. އޭގެ ތެރެއިން 16 މިލިއަން ރައްޔިތުން މިއަދު ކުރިއަށްދާ އިންތިޙާބުގައި ވޯޓުލުމަށް ރަޖިސްޓްރީ ވެފައިވެއެވެ