ސްރީލަންކާގައި 2022 ވަނަ އަހަރު ބޭއްވި ބޮޑު މުޒާހަރާތަކުގައި އެގައުމުގެ ލީޑަރު މަގާމުން ދުރުކުރި ފަހުން ފުރަތަމަ ފަހަރަށް އާ ރައީސަކު ހޮވަން ނަގާ ވޯޓުލުން ނިމި ވޯޓު ގުނަން ފަށައިފިއެވެ.

މިއަދު ނެގި ވޯޓަކީ މިހާތަނަށް ކުރިމަތިވި އެންމެ ނުރައްކާތެރި މާލީ ކާރިސާއަށް ފަހު ގައުމު ރަނގަޅުވުމުގެ މަގަށް އެޅުމުގެ މަގްސަދުގައި އިގްތިސާދީ އިސްލާހުތަކާ ބެހޭ ގޮތުން ނެގި ވޯޓެއްގެ ގޮތުގައި ގިނަ ބަޔަކު ދެކެ އެވެ. ނަމަވެސް ޓެކްސް ބޮޑުކުރުމާއި ސަބްސިޑީ އާއި ވެލްފެއާ ކަނޑާލުމުގެ ސަބަބުން ގިނަ ބަޔަކަށް އަދިވެސް ދަނީ އާމްދަނީ ހޯދުމުގައި ދަތިތަކެއް ކުރިމަތިވަމުންނެވެ.

އިންޑިއާގެ ތިންކް ޓޭންކެއް ކަމަށްވާ އޮބްޒާވަރ ރިސާޗް ފައުންޑޭޝަންގެ އެސޯސިއޭޓް ފެލޯ ސޯމްޔާ ބައުމިކް ބީބީސީއަށް ވިދާޅުވި ގޮތުގައި އެ ގައުމުގެ އިންފްލޭޝަން މައްޗަށް ދިއުމާއި ދިރިއުޅުމުގެ ޚަރަދު އުފުލުމާއި ފަގީރުކަމުގެ ސަބަބުން އަގުތައް ހަމައަކަށް އެޅުމަށާއި ދިރިއުޅުމުގެ ކަންކަން ރަނގަޅު ކުރުމަށް ހައްލު ހޯދުމަށް ވޯޓުލާ މީހުން ވަނީ ކެތްމަދުވެފަ އެވެ.

"އިގްތިސާދީ ހީނަރުކަމުން އަރައިގަންނަން މަސައްކަތް ކުރަމުން އަންނައިރު، މި އިންތިހާބަކީ ސްރީލަންކާގެ ރިކަވަރީ ޓްރެޖެކްޓަރީ ބައްޓަންކޮށް، އެގައުމުގެ ހިންގުމަށް ދާޚިލީ އަދި ބައިނަލްއަގްވާމީ ގޮތުން އޮތް އިތުބާރު އަލުން އިއާދަކުރުމަށް ވަރަށް މުހިންމު ދަނޑިވަޅެއް." ފެލޯ ސޯމްޔާ ވިދާޅުވިއެވެ.

މިއަދު ކުރިއަށްދިޔަ އިންތިހާބުގައި ސްރީލަންކާގެ ތާރީހުގައި ވެސް އެހެން ކެންޑިޑޭޓުންނަށްވުރެ ގިނަ ކެންޑިޑޭޓުން ވާދަކުރެ އެވެ.

މިއަދު ސްރީ ލަންކާގައި ކުރިއަށްދާ ރިޔާސީ އިންތިޙާބުގައި ރަނިލް ވަދާކުރައްވާއިރު، ކުރީގެ ރައީސް ގޮތަބަޔާ ރަޖާ ޕަކްސާއާއި އޭނާގެ އާއިލާ އިންސާފުގެ ކުރިމައްޗަށް ގެނައުމުގައި ފަސްޖެހި އެ ފަރާތަކަށް ހިމާޔަތްދޭކަމުގެ ތުހުމަތު ރަނިލްއަށްކުރެއެވެ. ނަމަވެސް ރައްޔިތުންގެ މި ތުހުމަތުތަކަށް ރަނިލް އިންކާރު ކުރައްވައެވެ.

ކޮރަޕްޝަނާއި ދެކޮޅަށް އަޑުއުފުލައި ހިންގަވާ ކެންޕޭނުތަކުގެ ސަބަބުން އިންތިޙާބުގައި ވާދަކުރައްވާ ވާތުފިޔައިގެ ކެންޑިޑޭޓު އަނުރަ ކުމަރަ ޑިސަނަޔަކޭއަށް ބޮޑު ތާއީދެއް އޮތްކަމަށް މަޝްރަހު ދިރާސާކުރާ ފަރާތްތަކުން ހާމަކުރެއެވެ. ރަނިލްއާއި ޑިސަނަޔަކަގެ އިތުރުން ސްރީލަންކާގެ އިދިކޮޅު ޕާޓީގެ ލީޑަރު ސަޖިތު ޕްރަމަދާސައާއި ކުރީގެ ރައީސް މަހިންދަ ރާޖަ ޕަކްސަގެ ދަރިކަލުން ނަމާލް ރާޖަ ޕަކްސަވެސް މިއަދު އިންތިޙާބުގައި ވާދަކުރައްވައެވެ.

އާބާދީގައި 22 މިލިއަން މީހުން ދިރިއުޅޭ ސްރީލަންކާގައި ވޯޓު ލުމުގެ ހައްޤު ލިބިފައިވާ 17 މިލިއަނެއްހައި މީހުން ދއެބަތިއްބެވެ. އޭގެ ތެރެއިން 16 މިލިއަން ރައްޔިތުން މިއަދު ކުރިއަށްދާ އިންތިޙާބުގައި ވޯޓުލުމަށް ރަޖިސްޓްރީ ވެފައިވެއެވެ.