ސަރުކާރުން ކުރިއަށްގެންދާ ފުރަތަމަ ޑިގްރީ ޕްރޮގްރާމްގެ ދަށުން މިއަހަރުގެ މިހާތަނަށް 85 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހާމަކޮށްފިއެވެ.

ހަޔާ އެޑިއުކެޝަން މިނިސްޓްރީން ހާމަކުރި މަޢުލޫމާތުގައިވާ ގޮތުން، މިއަހަރުގެ މިހާތަނަށް 1،100 ދަރިވަރަކު ވަނީ ފުރަތަމަ ޑިގްރީ ޕްރޮގްރާމްގައި އަލަށް ރަޖިސްޓްރީވެފައެވެ. މި ދަރިވަރުންނަށް ސަރުކާރުން ދަނީ މާލީ އެހީތެރިކަން ފޯރުކޮށްދެމުންނެވެ. އަދި މި ޕްރޮގްރާމްގެ ދަށުން މިހާރު ކިޔަވަމުންދަނީ ޖުމްލަ 8،086 ދަރިވަރުންނެވެ. މީގެ ތެރޭގައި ހިމެނެނީ 5،047 އަންހެން ދަރިވަރުންނާއި 3،039 ފިރިހެން ދަރިވަރުންނެވެ.

Ad by Hajj Corporation

ހިލޭ ޑިގްރީ ޕްރޮގްރާމަކީ މަތީ ތަޢުލީމަށް ކިޔެވުމުގެ ރޫޙު އާލާކޮށް، މާލީ ދަތިކަން ކުރިމަތިނުވެ ތަޢުލީމު ޙާޞިލުކުރުމަށް ފަހިކޮށްދިނުމުގެ މަޤްޞަދުގައި ސަރުކާރުން ތަޢާރަފުކޮށްފައިވާ ޕްރޮގްރާމެކެވެ. މި ޕްރޮގްރާމްގެ އަމާޒަކީ ރާއްޖޭގައި ވަޒީފާގެ ޑިމާންޑް އޮތް ދާއިރާތަކުން މީހުން ބިނާކުރުމުގެ ފުރުޞަތު ފަހިކޮށްދިނުމެވެ.

މިއަހަރުގެ މިހާތަނަށް މި ޕްރޮގްރާމަށް ސަރުކާރުން ވަނީ 85،478،150.89 ރުފިޔާ ޚަރަދުކޮށްފައެވެ. އަދި މި ސަރުކާރު އައި ފަހުން މިހާތަނަށް ޖުމްލަ 235 މިލިއަން ރުފިޔާ މި ޕްރޮގްރާމަށް ހޭދަކޮށްފައިވެއެވެ. ވޭތުވެދިޔަ 19 މަސްދުވަހުގެ ތެރޭގައި 3،888 ދަރިވަރުން ވަނީ މި ޕްރޮގްރާމްގައި އަލަށް ބައިވެރިވެފައެވެ.

މި ޕްރޮގްރާމްގައި ކިޔަވަމުންދިޔަ 2،068 ދަރިވަރަކު މިއަހަރު ވަނީ ދަސްވެނިވެފައެވެ. އަދި މި ސަރުކާރުގެ ދައުރުގައި މިހާތަނަށް ޖުމްލަ 5،412 ދަރިވަރުން ވަނީ މި ޕްރޮގްރާމްގެ ދަށުން ގްރެޖުއޭޓްވެފައެވެ.