މާލެ ސިޓީގެ އައު މަސް މާރުކޭޓާ ލޯކަލް މާރުކޭޓު ތަރައްޤީކުރުމުގެ މަސައްކަތް ލަސްވަމުންދާ ސަބަބު ދެނެގަނެ، އެކަމަށް ޙައްލު ހޯދުމާ ގުޅޭގޮތުން ސިޓީތަކާ އިދާރި ދާއިރާތައް ހިންގުމާ ބެހޭ ވުޒާރާއާއި މާލޭ ސިޓީ ކައުންސިލާއެކު މަޝްވަރާކުރައްވައިފިއެވެ.

މާލޭގައި ޒަމާނީ މަސް މާރުކޭޓެއް ތަރައްޤީކުރުމާއި ދަތުރުވެރިންގެ މާރުކޭޓާއި ލޯކަލް މާރުކޭޓު އަދި ވަޅޯމަސް މާރުކޭޓު އެއް އިމާރާތެއްގައި ހިންގާގޮތަށް ބަދަލުގެނައުމަށް ދަނީ ޕްލޭންކުރަމުންނެވެ. މި މަޝްރޫޢުގައި މަސް މާރުކޭޓު އެޅުމަށް ނިންމާފަވަނީ މިހާރުގެ ވަޅޯމަސް މާރުކޭޓު ހުރި ބިމުގައެވެ. އެކަން ކުރުމަށް އެ ބިން ކޮންޓްރެކްޓަރަކާވެސް ހަވާލުކޮށްފައިވެއެވެ.

Ad by Hajj Corporation

އަދި ލޯކަލް މާރުކޭޓާ ދަތުރުވެރިންގެ މާރުކޭޓު އަދި ވަޅޯމަސް މާރުކޭޓު ވަގުތީގޮތުން އެހެން ސަރަޙައްދަކަށް ބަދަލުކުރުމަށް، އެކަމަށް ވަގުތީ ބިންތަކެއްވެސް ހަމަޖައްސާފައިވެއެވެ. ނަމަވެސް މިހާތަނަށް މިކަމާ ގުޅޭ އެއްވެސް ޢަމަލީ މަސައްކަތެއް ފަށާފައެއް ނުވެއެވެ.

މި ބައްދަލުކުރެއްވުމުގައި ސިޓީތަކާ އިދާރީ ދާއިރާތައް ހިންގުމާ އާއްމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު އަދި މާލެ ސިޓީގެ މޭޔަރ އާދަމް އާޒިމްއާއި ވުޒާރާއާއި ކައުންސިލް މެންބަރުން ބައިވެރިވެވަޑައިގެންނެވިއެވެ. އަދި މަސައްކަތް ލަސްވަމުންދާ ސަބަބުތަކަކީ ކޮބާތޯ ބަލާ، މަސައްކަތް އަވަސްކުރުމުގައި ކުރެވެންހުރި ކަންކަން ދެނެގަތުމުގެ މަސައްކަތް ފަށާފަވާކަމަށެވެ. ވަޒީރު ވިދާޅުވީ މިކަމަށް އަވަސް ޙައްލެއް ހޯދުމަށް މަސައްކަތް ކުރަމުންދާކަމަށެވެ.

މާލޭ މަސްމާރުކޭޓު ތަރައްޤީކުރުމަށް ސަރުކާރުން ނިންމާފައިވަނީ 7 ފަންގިފިލާއަށެވެ. ވަގުތީ މާރުކޭޓުތަކުގެ މަސައްކަތް ނިމުމާއެކު ދާއިމީ މާރުކޭޓު ތަރައްޤީކުރުމުގެ މަސައްކަތް ފެށޭނެކަމަށް ސަރުކާރުންވަނީ ވިދާޅުވެފައެވެ. 

ސިޓީ ކައުންސިލާއެކު ބޭއްވި ބައްދަލުކުރެއްވުމާ ގުޅޭގޮތުން ދައުލަތުގެ މީޑިޔާއާ ޙިއްސާކުރެއްވި މަޢުލޫމާތުގައި އިދާރީ ދާއިރާތައް ހިންގުމާ ބެހޭ ވަޒީރު އާދަމް ޝަރީފު ޢުމަރު ވިދާޅުވީ، ސިޓީ ކައުންސިލާއެކު ބޭއްވި ބައްދަލުކުރެއްވުމުގައި މަޝްވަރާކޮށްފަވަނީ މާރުކޭޓުގެ މަސައްކަތް ލަސްވަމުންދާތީ އެކަމަށް ޙައްލު ހޯދުމާ ގުޅޭގޮތުންކަމަށެވެ. އެގޮތުން އެކަމުގެ ލިޔެކިޔުންތަކާ އަދި މިހާތަނަށް ހަދާފަވާ އެގްރިމަންޓްތަކުގައި ހުރި ކަންކަން ބަލާފަވާކަމަށެވެ.