މި ސަރުކާރުން ކައުންސިލްތަކުގެ ގާނޫނީ ޒިންމާ އަދާކުރުމަށް މަގުފަހިކޮށްދޭ ކަމަށް ސިޓީތަކާއި އިދާރީ ދާއިރާތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ވަޒީރު އެފަދައިން ވިދާޅުވީ، މިދިޔަ ހޮނިހިރު ދުވަހު އިދިކޮޅު އެމްޑީޕީން ބޭއްވި ކައުންސިލަރުންގެ ކޮންފަރެންސްގައި މި ސަރުކާރުން ކައުންސިލުތަކުގެ ޒިންމާ އަދާކުރުމަށް ހުރަސް އަޅާ ކަމަށާއި، ކައުންސިލުތަކަށް އެއްބާރުލުން ނުދޭ ކަމުގައި ބުނެ ސަރުކާރަށް ފާޑުކިޔުންތަކެއް އަމާޒުކޮށްފައިވަނިކޮށެވެ.

Ad by Hajj Corporation

އެގޮތުން ވަޒީރު ރޭ "އެކްސް"ގައި ކުރެއްވި ޕޯސްޓެއްގައި ވިދާޅުވީ، ލާމަރުކަޒީ ނިޒާމު ހަރުދަނާ ކޮށް، ކައުންސިލްތައް މާލީގޮތުން ބާރުވެރިކުރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންދަވަނީ ހަރުދަނާ ސިޔާސަތުތަކެއް އެކަށައަޅުއްވައި، ތަންފީޒު ކުރައްވަމުން ކަމަށެވެ.

އަދި ކައުންސިލްތަކަށް ފަޅުރަށްތައް ލިބޭނެ އުސޫލެއް އެކުލަވާލައްވައި، އެ އުސޫލުގެ ދަށުން ކައުންސިލްތަކުން މިހާރު އަންނަނީ ފަޅުރަށް ހޯދުމަށް ޕްރޮޕޯސަލް ހުށަހަޅުއްވަމުން ކަމަށާއި، އަދި އެ ޕްރޮޕޯސަލްތައް މިހާރު ދަނީ ރިވިއު ކުރަމުން ކަމަށް ވަޒީރު ވަނީ ވިދާޅުވެފައެވެ.

ވަޒީރު އިތުރަށް ވިދާޅުވީ، ރަށްތަކުން ނަގާ ޓެކްސް ގެ 10 އިންސައްތަ ކައުންސިލްތަކަށް ލިބޭނެ ސަރުކާރުން ވަނީ އިއުލާންކޮށްފައި ކަމަށާއި، އެ ނިޒާމުގެ ދަށުން ކައުންސިލްތަކުގެ ޢުމްރާނީ ހާލަތު ބަލައި، 50 ކައުންސިލް އިދާރާ އެޅުމަށް ދަނީ ތައްޔާރުވަމުން ކަމަށެވެ. އަދި ކޮންޓްރެކްޓާ ފައިނާންސް ގެ ދަށުން 55 ކައުންސިލެއް އެޅުމަށް ހުށަހަޅާފައިވާ ޕްރޮޕޯސްލް ރިވިއުކޮށް، އިކޮނޮމިކް ކައުންސިލަށް ހުށަހަޅާފައިވާ ކަމަށް މިނިސްޓަރ ވިދާޅުވިއެވެ.

ވަޒީރު ވިދާޅުވީ މި ސަރުކާރުން ތަފާތުކުރުމެއް ނެތި ހުރިހާ ކައުންސިލްތަކަށް ފުރިހަމަ އެއްބާރުލުންދީ، ކައުންސިލްތަކުގެ ޤާނޫނީ ޒިންމާ އަދާކުރާކަމުގެ މަގު ފަހިކޮށްދޭ ކަމަށާއި، އެކަން އެދަނީ މީޑިއާގައި ހާމަވަމުން ކަމަށެވެ.