ވެރިކަން ކުރާ ޕާޓީ، ޕީއެންސީގެ ފަރާތުން މާލެ ސިޓީގެ މޭޔަރުކަމަށް ވާދަކުރައްވާ މޫސާ އަލީ ޖަލީލަކީ ގައުމަށް ގައްދާރުވާނެ ބޭފުޅެއް ނޫން ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން ފަސްޓްލޭޑީ ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ މާލެ ސިޓީ ކައުންސިލްގެ މާފަންނު ދެކުނު ދާއިރާގެ ބައި-އިލެކްޝަންގައި ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުންގެ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

Ad by Hajj Corporation

މެޑަމް ސާޖިދާ ވިދާޅުވީ ވޯޓު ދޭންޖެހޭނީ އެފަދަ އިޚްލާސްތެރި ބޭފުޅުންނަށް ކަމަށާއި ޕީއެންސީ ކެންޑިޑޭޓުންގެ ފަސްބައި ބަލާއިރު، އެ ބޭފުޅުންނަކީ ގައުމީ މަސައްކަތުގައި ސާބިތުވެ ތިއްބަވާނެ ބޭފުޅުންކަން ޔަގީންވާ ކަމަށެވެ.

މީގެއިތުރުން މޫސާ އަލީ ޖަލީލު ވަނީ 1988 ނޮވެމްބަރު 3 ގައި ގައުމަށްޓަކައި މަތިވެރި ގުރުބާނީއެއް ވެވަޑައިގެންނެވި، ހިތްވަރުގަދަ ފަހުލަވާނެއްކަން ފާހަގަކުރައްވާ އެކަމަނާ ވިދާޅުވީ އެފަދަ ގުރުބާނީއެއް ގައުމަށްޓަކައި ވެވަޑައިގަތް ބޭފުޅެއްގެ ހިތްޕުޅުގައި ގައުމަށް އޮންނާނެ ލޯތްބާއި، ގައުމަށްޓަކައި މަސައްކަތްކުރައްވާނެ ގޮތް އެއްވެސް މީހަކަށް ނޯޅޭނެ ކަމަށެވެ.

ފަސްޓް ލޭޑީ އިތުރަށް އެކަމަނާ ވަނީ ކޮންގްރެސް ޕާޓީގެ މެންބަރުންާއި ވަކި ޕާޓީއަކަށް ނިސްބަތްނުވާ މީހުންނާއި ވާދަވެރި ޕާޓީތަކުގެ އާންމު މެންބަރުންވެސް، ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރު ހިންގާ ކޯލިޝަންގެ ކެންޑިޑޭޓުންނަށް ވޯޓު ދެއްވުމަށް އިލްތިމާސް ކުރައްވާފައެވެ.