ބާސެލޯނާގެ ސްޓާ ކުޅުންތެރިޔާ ލަމީން ޔަމާލް އަށް މީގެ ދެދުވަސްކުރިން 18 އަހަރުވެފައިވާއިރު، ކުރިޔަށް އޮތް 24 ގަޑިއިރުތެރޭގައި އައު ކޮންޓެރްކްޓުގައި ސޮއިކުރާނެކަމަށް ރިޕޯޓްތައް ބުނެފިއެވެ.

ޔަމާލް މިފަހަރު ކޮންޓްރެކްޓް އައުކުރުމުން އޭނާ ވެގެންދާނީ ބާސެލޯނާގެ އެންމެ މުސާރަބޮޑު ކުޅުންތެރިޔާއަށެވެ. އައު ކޮންޓެރެކްޓާއެކު ޖުމްލަ އަހަރަކު އެޑް-އޮންސް ތަކާއެކު 40 މިލިޔަން ޔޫރޯގެ މުސާރައެއް ދޭނެެއެވެ. ބާސެލޯނާގެ މިހާރު އެންމެ މުސާރަ ބޮޑުކުޅުންތެރިޔަކީ 36 އަހަރުގެ ލެވަންޑޮވްސްކީއެވެ. އޭނާގެ މުސާރައަކީ އަހަރަކު 38 މިލިޔަން ޔޫރޯއެވެ.

މީގެއިތުރުން އައު ކޮންޓެކްޓާއެކު ބާސެލޯނާގެ ލެޖެންޑަރީ 10 ނަންބަރު ޔަމާލް އަށް ދިނުމަށް ހަމަޖެހިފައިވާކަމަށް ބެލެވެއެވެ. މީގެ ކުރިން ބާސެލޯނާގެ 10 ނަންބަރު ޖޯޒީ ބޭނުންކޮށްފައިވާ ކުޅުންތެރިންގެ ތެރޭގައި މެސީ އާއި ރޮނާލްޑީނިއޯ އާއި ރިވާލްޑޯ އާއި ރޮމާރިއޯގެ އިތުރުން ޑިއޭގޯ މަރަޑޯނާވެސް ބާސެލޯނާގައި 10 ނަންބަރު ޖޯޒީ ބޭނުންކޮށްފައިވެއެވެ.

ބާސެލޯނާގެ ޖޯޒީގައި ޔަމާލް މިދިޔަ ސީޒަނުގައި ޖުމްލަ ތިން ތަށްޓެއް ކާމިޔާބުކޮށްފައިވާއިރު، އުމުރުން 18 އަހަރުގައި ޔަމާލް ވަނީ ބާސެލޯނާއަށް 112 މެޗު ކުޅެދީ 25 ގޯލާއި 34 އެސިސްޓްހަދާފައެވެ.